Dr Baasler Kunstkredit
Dr Baasler Kunstkredit isch e Ressor in dr Abdäilig Kultur vom Bresidialdepartemänt vom Kantoon Baasel-Stadt, wo d Ufgoob het, zitgenössischi Künstler us dr Regioon z fördere. Für daas organisiert er jeedes Joor Wettbewärb und kümmeret sich um si Sammlig, wo mee as 5000 Wärk umfasst. Dr Sitz vom Kunstkredit Basel-Stadt isch am Dalbe-Graabe 16 z Baasel.
| Dialäkt: Baseldütsch |
Kriterie
ändereDr Kunstkredit het e langi Dradizioon. Er isch 1919 gründet worde, nid nume zum Kunst z vermiddle sondern au zum de Künstler, wo noch em Erste Wältchrieg e schweere Stand gha häi, under d Ärm z griffe. Hüte isch s Kriterium zum gförderet wärde die künstlerischi Kwalidäät vom Wärk und nit die finanzielli Laag vom Künstler.
Er het hüte e Büdsche vo numen ere halbe Million Franke bro Joor. Mit däm bewaart er si Sammlig uf und chauft nöiji Wärk, won er denn vilmol öffentlig usstellt, wie d Helvezia uf dr Räis am Chläibaasler Kopf vo dr Middlere Brugg. Das füert immer wider emol zu Greed, wenn e Wärk umstritte isch.
D Kommission, wo d Gälder verdäilt, bestoot us Künstler und Kuratore, wo vom Regierigsroot usgweelt wärde, eme Verdräter vom Bresidialdepartemänt und em Kantonsbaumäister, wo in Sache Kunst am Bau öbbis z sääge het. Mitmache bi de Usschriibige chönne Künstler, wo sälber oder s Wärk von ene öbbis mit Baasel, sig s em Land oder dr Stadt, z due häi.
Die mäiste Wärk us dr Sammlig hänke in de Aarbetsrüüm vo dr kantonale Verwaltig. Die wo dört schaffe, döfe si sälber uuselääse, müesse denn aber drei Joor lang mit ene lääbe. Nume für e Baschi Dürr, em Vorsteher vom Justiz- und Sicherhäitsdepartemänt, het s in dr Sammlig nüt gha, wo guet gnueg für en gsi isch, und er het en äxtra Wettbewärb lo usschriibe.
Kwelle
ändere- Kunstkredit Basel-Stadt, abgrüeft am 19. April 2016
- Kunstkredit: Kunstförderung, abgrüeft am 19. April 2016
- Wahrnehmungsschub für Kunstszene, abgrüeft am 19. April 2016