Dr Lälleköönig isch e Basler Woorzäiche, wo fast zwäi Joorhundert lang vom Goossbaasler Rhiidoor aabe de Lüt im Chläibasel d Zunge uusegstreckt het. Lälli isch en alemannische bzw. Basler Usdruck für Zunge.

Kopii vom Lälleköönig mit beweeglige Auge und Zunge am Huus Schiffländi 1 z Basel
Dialäkt: Baseldütsch

1641 het mä am Rhiidoor, linggs näbe dr Uur uf dr Rhiisite e Chopf aagmacht, wo in Chupferblääch driibe und 26x31 cm grooss gsi isch. Dr Daniel Neuberger us Augsburg het die Fratze konstruiert und si isch mit em Uurwärk vo dr Durmuur verbunde gsi, eso, ass si alli 15 Sekunde d Auge verdräit und dr Lälli 10 cm wit uuse gstreckt het. Dr Chopf het Oore, wo abstöön, e spitzigi Naase und e Bart ghaa und e Chroone oobedruf.

Was d Bedütig vo deere Figuur sött si, doodrüber git s e Hufe Theorie. Villicht hätt si ganz äifach d Lüt sölle z Lache mache, oder villicht häi d Groosbasler mit em Lälleköönig de Chläibasler uf dr andere Site vom Rhii d Zunge uusegstreckt und sä eso verhöönt. Villicht isch ganz äifach e Niidchopf gsi.

Wo s Rhiidoor abbroche worden isch, het mä dr Lälleköönig ins Historische Museum brocht und er isch jetz in dr Barfüesserchille.

Sustigs ändere

 
S Rhiischiff «Lällekönig»
  • An dr Schiffländi 1 z Basel, wo öbben emol s Rhiidoor gstande isch, cha mä am Restorant «Lälleköönig» grad zwäi Lälleköönig gsee, äine us Stäi am Egge vo dr Fassade und e noochbaute Blääch-Lälli under em Vordach näbe dr Iigangsdüüre. Dä streckt regelmäässig si Lälli uuse und rollt mit de Auge.
  • D MS Lällekönig isch e Boot vo dr Basler Personenschifffahrt.
  • D Lälli Clique isch e Basler Fasnachtskligge.

Litratuur ändere

  • Albert Spycher: Der Basler Lällenkönig, seine Nachbarn, Freunde und Verwandten, 1987 (Broschiert), 96 Seiten, ISBN 3719009858

Weblingg ändere

  Dä Artikel basiert uff ere fräie Übersetzig vum Artikel „Lällenklnig“ vu de dütsche Wikipedia. E Liste vu de Autore un Versione isch do z finde.