Leda

D Leda (altgr. Λήδα, Lēdā) isch in dr griechische Müthologii d Dochter vom ätolische Köönig Thestios und vo dr Eurythemis. Iiri Schwöstere si d Althaia und d Hypermestra. Si isch d Frau vom schbartanische Köönig Tyndareos gsi.

Dr Müthos

D Gschicht vom Zöis und dr Leda isch scho in eltiste Ziten in ere andere Versioon überliiferet. Noch dere het sich dr Zöis nit in Leda, sondern in d Rachegöttin Nemesis verliebt.

Für dass si dr Zöis nid verwütschi, het d Leda sich noch enander in e Hufe verschidnigi Dier verwandlet, zum Schluss in e Gans. Sofort het dr Zöis d Gstalt vom ene schööne Schwaan aagnoo, het sä verfüert und gschwängeret. Aber au iire Maa Tyndareos het in deere Nacht mit ere gschloofe. D Leda het denn zwäi Äier mit vier Chinder din geboore - vom Zöis d Helena und dr Polydeukes (latiinisch Pollux), vom Tyndareos d Klytaimnestra und dr Kastor, dorum si die erste bäide unstärblig gsi, die bäide andere aber stärblig.

D Helena, wo für iiri Schöönhäit berüemt gsi isch, het dr schbartanisch Köönig Menelaos ghürootet und isch spööter vom Paris uf Dröija entfüert worde. D Klytaimnestra drgeege het däm si Brueder Agamemnon, dr Köönig z Mykene, ghürootet. D het noch dr Entfüerig vo dr Helena d Grieche gege Dröija gfüert, zum d Helena zruggzbringe.

Es git Versioone, wo nume d Helena us eme Äi schlüpft, in andere chömme dr Kastor und Polydeukes us em gliiche Äi uf d Wält.

Dr Kastor und dr Polydeukes wärde as d Dioskuure („Zöisjüngling“) bezäichnet (vgl. Kouros) und as göttligi Hälfer vo dr Schifffaart vereert.

In ere andere Versioon vom Müthos isch s göttlige Äi dr Leda vo dr Rachegöttin Nemesis, wo e Find vom ganze Köönigsgschlächt vo de Atriide, wil die emol gröiligi Daate begange häi, underschoobe worde. D Leda weer denn nume d Milchmueter vo dr Helena gsi.

In dr Kunst

In dr Kunstgschicht isch d Leda mit em Schwaan lang e beliebts erotischs Motiv gsi. E berüemti Darstellig, wo hüte verloore isch, het dr Michelangelo Buonarroti 1529/30 gmacht.

Galerii

• 
  Studie vom Leonardo da Vinci zum ene Gmäld, wo zwüsche 1503 und 1507 entstande und hüte verlooren isch.
• 
  Kopii vom ene verloorene Gmäld vom Michelangelo.
• 
  Gmäld vom Correggio öbbe us em Joor 1532
• 
  Gmäld vom François Boucher us em Joor 1742
• 
  Skulptur vom franzöösische Bildhauer Jean-Baptiste Clésinger us em Joor 1864
• 
  Gmäld vom Paul Cezanne, us de Joor 1880-1882

Weblingg

 Commons: Leda – Sammlig vo Multimediadateie

• D Leda mit em Schwaan in der National Gallery z London

Dä Artikel basiert uff ere fräie Übersetzig vum Artikel „Leda_(Mythologie)“ vu de dütsche Wikipedia. E Liste vu de Autore un Versione isch do z finde.