Manfred Kern

Dialäkt: Undermarkgreflerisch

Dr Manfred Kern (* 11. Augschte 1958 z Mannem) isch e dytsche Styyrberoter un Bolitiker (Bindnis 90/Di Griene). Syter anne 2011 isch er Abgordnete im Landdag vu Bade-Wirttebärg.

dr Manfred Kern, 2013

Uusbildig un Beruef

Dr Manfred Kern isch mit vier Gschwischter ufgwachse, in dr erschte Johr z Mannem, derno sin syni Eltere mit dr Chinder uf Schwetzinge zoge. Noch em Abitur am Hebel-Gymnasium Schwetzinge het dr Kern z Darmstadt mir eme Architekturstudium aagfange, ab 1981 het er derno an dr Fachhochschuel Worms Bedribswirtsschaftslehr mit dr Fachrichtig Verchehrswäse/Turischtik studiert. Noch em Abschluss anne 1985 het er z Mannem in dr Wirtschaftspriefigsgsellschaft Dr. Berkhemer & Partner gschafft un si schließli 1990 bis 2010 as Styyrberoter sälbständig gmacht. Anne 2007 isch er zum veraidigte Buechpriefer bstellt wore, syter anne 2011 isch er Seniorpartner vu Kern & Partner.

Bolitischi Laufbahn

Dr Manfred Kern isch in dr Zyt vum Bundeschanzler Wiliy Brandt Mitglid vu dr SPD wore. Ab 1980 het er si bi dr grien-alternative Lischt z Brihl engaschiert. Anne 1998 isch dr Kern Mitglid vu dr Griene wore. Vu 1999 bis 2009 isch er Gmaindsrot in dr Stadt Schwetzinge gsii. Wu di Griene uf Bundesebeni em Afghanistan-Yysatz zuegstimmt hän, isch dr Kern us dr Bartei uusdrätte. Anne 2006 isch er wider Mitglid vu dr Griene wore, wel er d Widerwahl vum Schwetzinger CDU-Burgermaischter het welle verhindere. Bi dr Kommunalwahl 2009 isch dr Kern in dr Kraisdag vum Rhy-Necker-Krais gwehlt wore. Sy Mandat as Stadtrot het er derno ufgee.

Bi dr Landdagswahl z Bade-Wirttebärg 2011 isch er iber s Zwaitmandat im Wahlkreis Schwetzinge in dr Landdag vu Bade-Wirttebärg gwehlt wore. Dert isch er kulturbolitische Sprächer vu dr Griene-Fraktion un Sprächer fir Dänkmolpfläg.

Sunschtigs Engaschmänt

Scho in syre Juged het si dr Kern as Jugedlaiter vu dr Evangelische Juged z Schwetzinge engaschert un ab 1975 as Schuelsprächer am Schwetzinger Hebel-Gymnasium.

• Zweete Vorsitzer vum Chinesische Kulturzentrum Rhein-Neckar e. V.
• Mitglid vum Vorstand vu dr Interessengemeinschaft Schwetzinger Vereine e. V.
• Mitglid in dr Kulturkommission vum Rhy-Necker-Krais
• Mitglid im Deutschen Buchprüfer-Verbands
• Mitglid im Naturschutzbund Deutschland (NABU)
• Mitglid im Förderverein für Städtepartnerschaften e. V
• Mitglid vum Vorstand vu dr Jazzinitiative Schwetzingen

Persenligs

Dr Manfred Kern isch evangelisch. Är isch ghyrote un het mit syre Frau drei Chinder. Noch em Studium hän si zerscht z Hockene gwohnt un sin schließlig uf Schwetzinge zoge.

In syre Freizyt macht dr Kern Musik un singt. As Chind het er im Chinderkoor vum Mannemer Nationalthater gsunge, derno het er Gitarre glehrt un in Danzcombo mitgspilt. E Huffe Johr het er im Schwetzinger Kammerchor Quatro Forte gsunge, mittlerwyli singt er im Heidelberger HardChor un solistisch as Jazzsänger.

Weblink

 Commons: Category: – Album mit Multimediadateie

• Websyte vu dr Manfred Kern
• Uuszug us em Abgordnete-Handbuech vum Landtag vu Bade-Wirttebärg fir di 15. Wahlperiod (PDF; 689 kB)
• Manfred Kern (Politiker) uf abgeordnetenwatch.de
• Profilsyte bi dr Griene-Fraktion