Manor AG

D Manor AG isch die gröschti Schwizer Waarehuuschetti. Si ghört zur Manor-Grubbe, wo au d Sportartikelchetti Athleticum bedribt. D Manor-Grubbe ghöört zur Maus Frères Holding mit Sitz z Gämf.

Manor AG
Unternähmensform	Akziegsellschaft
Sitz	Baasel, Schwiz
Umsatz	2,8 Mrd. CHF (2013)
Branche	Detäihandel
Uffdritt im Netz	www.manor.ch

Manor an dr Baanhofstrooss z Züüri im Warehuus, wo dr Archidekt Richard Kuder 1900 für e Julius Brann baut het.

D Manor-Waarehüüser häi im Joor 2013 en Umsatz vo CHF 2,8 Milliarde gmacht. Si häi öbbe 10'600 Mitarbäiter. Wie hooch dr Gwünn isch, isch nid bekannt.

S Undernääme bedribt in dr Schwiz 64 Waarehüüser. Iire Määrtaadäil wird uf knapp 60 % gschetzt was Manor zur grösste Waarehuuschetti in dr Schwiz macht. Wichdigi Konkuränte si d Migros mit iirer Waarehuuschette Magazine zum Globus, Coop City-Waarehüüser, Jelmoli und in dr Region Bärn Loeb.

S Sortimänt vo Manor bestoot us Äigemarke wie Yes or No, Avant Première, JJBenson und Maddison, und us Markenardikel. Manor posizioniert sich im middlere Briissegmänt. Im Septämber 2013 het Manor as erste Schwizer Detäihändler für die, won e Manor-Kundecharte häi, e Süsteem für mobils Zaale per App iigfüert.

Weblingg

 Commons: Manor AG – Sammlig vo Multimediadateie

• Website vo dr Manor AG