D’ Mariah Carey [məˈɹaɪə ˈkɛəɹi] (* 27. März 1969[1] z’ Huntington, Long Island, Näi York) ìsch a US-àmerikànischa Sangera, Liadermàchera, Müüsikproduzänta un Schàuischpììlera. Sa ìsch ìn Pop-, Hip-Hop- un R&B-Liader z’ loosa. Sa ìsch bekànnt fìr ìhra fìmf Oktààwa groossa Schtìmmumfàng, ìhra melismatischa Gsàngsschtiil un ìhra Nutzung vum Pfiffaregischter. Sa ìsch ànna 1990 mìt ìhrem Debüü-Àlbum Mariah Carey berìahmt worra. Sa hàt àls äärschta Kìnschtlera ìhra äärschta fìmf Sìnggel uff dr Schpìtzaplàtz vum Billboard Hot 100 gebrocht —drunter d’ Liader Vision of Love un Emotions. Sa ìsch àui bekànnt fìr ìhra Feeriamüüsik, bsunderscht fìrs Wiahnàchtsliad All I Want for Christmas Is You (1994). Wagadam hàt maa sìe àls „Wianàchtskeeniga“ (Queen of Christmas) bezaichent.

D’ Mariah Carey ànna 2018
Ìn dr Mariah Carey ìhra Unterschrìft
Ìn dr Mariah Carey ìhra Unterschrìft
Dialäkt: Mìlhüüserdiitsch

Ìn dr Carey ìhr Debüü-Àlbum ìsch unter dr Fiahrung vum Tommy Mottola, ema Vorschtànd vu Columbia Records, veräffentligt worra. Dräi Joohra schpeeter hàt’ne d’ Carey ghiiroota. Witterscht hàt sa a waltwitter Ärfolg ghàà mìt da Àlba Music Box (1993) un Daydream (1995); bsunderscht d’ Sìnggel Hero, Without You, Fantasy, Always Be My Baby un One Sweet Day sìnn gmärkt worra. D’ lätschta-n-ìsch dr längschta Nummer-Ains-Hit ìm Joohrzehnt gsìì un ìsch àm Schpìtzaplàtz vum Billboard Hot 100 vum Joohrzehnt 1990 gsìì. Noh dr Schaidung mìt’m Mottola hàt d’ Carey änder „schtädtischa Müüsik“ gmàcht. Soo ìsch s’ Àlbum Butterfly (1997) mìt Hip-Hop-Elemanta gepräägt. D’ Carey ìsch vu dr Zittschrìft Billboard àls Kìnschtlera vum Joohrzehnt 1990 ärnännt worra, un ìsch bii da World Music Awards üsszaichent worra àls d’ wiibliga Popkìnschtlera mìt da bäschta Verkaif ìm Joohrtoisig. Bis 2001 hàt sa älf Joohra làng uffanànderfolgend mìndeschtens je ain Nummer-Ains-Hit ìn da US-Charts plàtziart.

Ànna 2001 hàt sa d’ Columbia Records fàraloo un hàt a Vertrààg vu 100 Millioona Dollar mìt da Virgin Records unterzaichent. Ìhra Ufftrìtt ìm Film Glitter ànna 2001 ìsch a Fahlschlààg gsìì; wagadam hàt d’ Virgin Records ìhra Vertrààg fìr 28 Millioona Dollar uffkàuift. Ìm Joohr druff hàt d’ Kìnschtlera-n-a Vertrààg bii Island Records unterzaichent. Noh a pààr Joohra ohna bediitender Ärfolg ìsch sa mìt ìhrem Àlbum The Emancipation of Mimi (2005) wììder ìn da Charts ufftratta. Dàs ìsch s’ Àlbum gsìì mìt da bäschta Verkaif ìn da USA, un s’ zwait maischtverkàuifta-n-Àlbum ìn dr gànza Walt ìm Joohr 2005. D’ zwaita Sìnggel uff’m Àlbum, We Belong Together, ìsch sogààr àm Schpìtzaplàtz vum Billboard Hot 100 vum Joohrzehnt 2000 gsìì. Fìr ìhra Rolla-n-ìm Film Precious (2009) hàt d’ Carey dr Priis fìr d’ wiibliga Durchbruch-Ufffiahrung bii da Internàzionààla Filmfaschtschpììler vu Palm Springs bikumma. Naawadràà ìsch sa amol Mìtglììd ìm Jury vun American Idol gsìì un ìsch ìn dr Belehrseria Mariah’s World z’ sah gsìì. Witterscht ìsch sa ìn da Filma The Butler (2013), A Christmas Melody (2015) un The Lego Batman Movie (2017) ufftratta. Ìm Joohr 2020 ìsch ìhra Memoire Mariah – Ganz ich selbst üssagànga.

D’ Carey zehlt unter da kommerziäll ärfolgriichschta Müssikànta vun àlla Zitta. Ìnsgsàmt hàt sa mehr àss 220 Millioona Schàllplàtta ìn dr Walt verkàuift. Dr Rekord vu da maischta Nummer-Ains-Sìnggel ìn da USA hàt sa dräifàch gebrocha: àls Solo-Kìnschtlera (19 Sìnggel), wia àui àls wiibliga Liadermàchera (18) un àls wiibliga Produzänta (15). Üsserdam ìsch sa d’ wiibliga Kìnschtlera mìt da maischta Üsszaichnunga fìr Müüsikverkaif ìn da USA un d’ Zeehnta ìn dr gànza Walt, mìt 72 Millioona üsszaichenta Àlbum-Toontraager. Ànna 2008 hàt sa mehrera Chart-Rekorda mìt’m Liad Touch My Body gebrocha un ìsch vu dr Zittschrìft Time unter da 100 iiflussriichschta Kìnschtler un Unterhàlter ìn dr Walt glischtet worra.[2] Ìm saalwa Joohr ìsch sa Zwaita ìn dr Lischta vu da 100 bediitendschta Fràuija ìn Müüsik vum Kànààl VH1 gsìì. Ànna 2019 hàt sìe d’ Zittschrìft Billboard àls d’ wiibliga Solo-Kìnschtlera mìt da bäschta Chartplàtziarunga ärnännt — drbii sìnn d’ Sìnggel- wia àui d’ Àlbumplàtziarunga ìn Beziihung gnumma worra. Ìm Làuif vun ìhrer Kàrriar hàt d’ Carey 5 Grammy Awards, 19 World Music Awards, 10 American Music Awards, 15 Billboard Music Awards un àcht Guinness World Records gwunna. Ànna 2022 ìsch sa ìn d’ Songwriters Hall of Fame uffgnumma worra.[3][4]

Lìteràtüür ändere

Weblìnks ändere

  Commons: Mariah Carey – Sammlig vo Multimediadateie

Ainzelnoohwiisa ändere

  1. The Long-Islander. (Huntington [N.Y.]) 1839-current, April 10, 1969, Image 15. Nr. 1969/04/10, 10. April 1969, S. 15 (nyshistoricnewspapers.org [abgerufen am 13. April 2021]).
  2. Stevie Wonder: Mariah Carey - The 2008 TIME 100. In: Time. 12. Mai 2008, archiviert vom Original am 15. Juli 2022; abgruefen am 15. Dezember 2022 (amerikanischs Änglisch).
  3. Laureta Nrecaj: Mariah Carey und weitere geehrt. Auszeichnungen für Songschreiber verliehen. In: Stuttgàrter Zittung. 17. Juni 2022, archiviert vom Original am 25. Dezember 2022; abgruefen am 25. Dezember 2022.
  4. Mark Kennedy, Associated Press: Mariah Carey, Neptunes, Annie Lennox inducted into Songwriters Hall of Fame. In: Los Angeles Times. 17. Juni 2022, archiviert vom Original am 12. Juli 2022; abgruefen am 25. Dezember 2022 (amerikanischs Änglisch).
  Dä Artikel basiert uff ere fräie Übersetzig vu dere Version vum Artikel „Mariah_Carey“ vu de änglische Wikipedia. E Liste vu de Autore un Versione isch do z finde.