Dr Martí Gasull i Roig, wo am 2. April 1969 z Barcelona uf d Wält cho und am 23. Septämber 2012 z Nepal gstorben isch, isch e katalanische Filosoof, Sproochaktivischt und Bärgstyyger gsi.

Er het a der Autonome Uni Barcelona Filosofy und drno au Betribswirtschaft studiert.

1991 het er zäme mit andere d Kulturgruppe Esbarzer gründet, wo sech für d Landessprooch vo Kataloonie engaschiert het. Do druus isch anne 1993 die grösseri Sproochorganisazioon Plataforma per la Llengua worde, wo d Situazioon vom Kataloonische als Minderhäitesprooch z Spanie wott verbessere. Dr Martí Gasull i Roig isch es paar Joor lang dr Vordänker vo dere Bewegig gsi. Er het für se Projäkt gmacht und grundlegendi Schrifte zämegstellt.

Als begeischterete Sportler het dr Martí Gasull i Roig bim Bärgschtyygerverein vo Kataloonie mitgmacht. Er isch uf grossi Tuure uf allne Kontinänt, i den Alpe, won er uf die meischte hööche Gipfel ufeklätteret isch, i den Ande, em Himalaya und andere Gebirge. Am 23. September 2012 het er bim ene Lawineunglück z Nepal s Lääbe verloore.

Noch sym Tod het iim die katalanischi Provinzregierig s Sankt-Georgs-Chrüüz und dr Stadtroot vo Barcelona d Guldmedallie für kulturelli Verdienscht gää.

Für sys Adänke het d Platforma per la Llengua der Uszeichnig, wo si verdiente Lüüt git, Martí Gasull i Roig-Pryys gseit.