Michael Schumacher

Dr Michael Schumacher (* 3. Jänner 1969 z Hürth) isch e ehmolige dytsche Automobilrännfahrer.

Lääbe

Är isch vu 1991 bis 2006 un vu 2010 bis 2012 bi insgsamt 307 Große Bryys vu dr Formel-1-Wältmaischterschaft an Start gange. Är het sibe Wältmaischtertitel gwunne (1994, 1995, 2000, 2001, 2002, 2003 un 2004), fimf Wältmaischterschafte in Folg un 77 schnällschti Rännrundene. Sy Rekord vu 91 Siig, 68 Pole-Positions un 155 Podeschtblatzierige sin nume no vum Lewis Hamilton iberbote wore.

In Johr 1990 un 1991 isch dr Schumacher in dr Sportwage-Wältmaischterschaft aktiv gsii, 1991 het er bim Große Bryys vu Belgie fir Jordan in dr Formel 1 debütiert. Zum negschte Ränne isch er zue Benetton gwägslet, wun er bis 1995 bliben isch. In syre Zyt bi Benetton het dr Schumacher 1992 z Belgie sy erschte Grand Prix gwunne un isch 1994 un 1995 Formel-1-Wältmaischter wore. 1996 isch er zue Ferrari gwägslet, wun er bis 2006 aktiv gsii isch. Dr Schumacher het vu 2000 bis 2004 fimfmol in Folg d Wältmaischterschaft gwunne. Noch ere meejehrige Paus isch er 2010 fir drei Johr zue Mercedes in d Formel 1 retuurchuu. Är het no aimol e Podeschtblatz ghaa, sy beschti Gsamtblatzierig in däne drei Johr isch 2011 dr acht Rang gsii.

Mit syre Frau Corinna geb. Betsch (* 1969) het dr Schumacher zwai Chinder. D Familie wohnt syt 1996 in dr Schwyz im Kanton Waadt, bis 2008 z Vufflens-le-Château un syterhär z Gland. Sy Brueder Ralf isch au Automobilrännefahrer gsii, wu zwische 1997 un 2007 in dr Formel 1 un 2008 bis 2012 in dr DTM gfahren isch.

Im Dezämber 2013 het si dr Schumacher bi me Schyyuufall schwäri Chopfverletzige zuezoge. Syterhär isch er in medizinischer Rehabilitation, s git kai effetligi Informazione iber sy Gsundhaitszuestand.

Weblink

Commons: Michael Schumacher – Sammlig vo Multimediadateie

Offiziälli Websyte vum Michael Schumacher
Porträä, Daten un Biografi vu Michael Schumacher in dr Hall of Fame des deutschen Sports (Link uf s „Register“, direkti Verlinkig nit megli)
Literatur vu un iber Michael Schumacher im Katalog vu dr Dütsche Nazionalbibliothek