Micurà de Rü

Dä Artikel beschrybt de Sprochwisseschaftler. S Institut, wo syn Name het, findsch unter Istitut Ladin Micurà de Rü.

Dialäkt: Undermarkgreflerisch

Dr Micurà de Rü (alias Nikolaus Bacher; * 4. Dezämber 1789 z Rü, St. Kassian, Abtei (Südtirol); † 29. März 1847 z Wilten) isch e ladinische Sprochwisseschaftler gsi.

Dr Micurà de Rü isch as jingschte Suhn vun ere vierchepfige Bärgburefamilie uf d Wält chuu. No dr Volksschuel z St. Kassian un em Gymnasium z Brixen het er Filosofii un Theologii studiert, unter anderem z Innschbruck, z Trient un z Salzburg. Am 28. Augschte 1814 isch er z Salzburg zem Prieschter gweiht wore. Syyni erschte Prieschterjohr het er in verschidene Pfarreie z Eschtryych verbrocht. Är het e baar Johr as Fäldkaplan gschafft un as Erzieher in eme Militärbuebe-Erziehigsinschtitut z Mailand. E churzi Zytlang het dr Micurà de Rü au as Lektor fir Italienisch an dr Universitet Innschbruck gschafft.

Näb em Prieschteramt het syy bsunder Inträssi aber syyre Muetersproch gulte, em Ladinisch. Anne 1833 het er as erschter e ladinischi Grammatik verfasst mit em Titel Versuch einer deütsch-ladinischen Sprachlehre – Erstmalige Planung einer gesamtdolomitenladinischen Schriftsprache. D Grundidee vu däre Grammatik isch d Bildig vun ere gmeinsame Schriftsproch fir alli Ladiner gsi. In Erinnerig an dr Micurà de Rü isch s Ladinisch Kulturinschtitut z St. Martin in Thurn noch em gnännt wore.

Literatur

• Lois Craffonara (1994): Micurà de Rü / Nikolaus Bacher (1789 - 1847). Leben und Werk. Ladinia (XVIII): 5-133.

Weblink

• Offiziälli Syte vum ladinische Kulturinschtitut mit ere Bschryybig vum Micurà de Rü

Dä Artikel basiert uff ere fräie Übersetzig vu dere Version vum Artikel „Micurà_de_Rü“ vu de dütsche Wikipedia. E Liste vu de Autore un Versione isch do z finde.