Mix et Remix

Mix & Remix, burgerli Philippe Becquelin (* 6. April 1958 z Saint-Maurice VS; † 19. Dezämber 2016), isch e Schwyzer Cartoonischt un Illuschtrator gsii. Är het zum aktuälle Zytgschääne e Huffe Karikature zaichnet, unter anderem fir L’Hebdo. Är het au bim Weschtschwyzer TV-Magazin Infrarouge gschafft.

Mix & Remix am Buechsalon 2011 z Gämf.

Lääbe

Dr Philippe Becquelin het scho as Chind mit em Zaichne aagfange, sy sy Vater isch e begaischteret Lääser vu Comic gsii. Är isch uf s Gimnasium vu Saint-Maurice gange, het d Schuel aber ai Johr vor dr Matura abbroche. Sech Monet isch ert uf d Chunschthochschuel z Sittu gangen un het anne 1984 e Diplom vu dr Molerei an dr Kantonale Chunschthochschuel z Lausanne gmacht. Wel er syni Bilder zäme mit syre Frau gmoolt het, wun er im nämlige Johr chänneglehrt ghaa het, hän si s Pseudonym Mix & Remix gwehlt. Wun er d Molerei ufgee het het, het er dää Chinschtername wyter gfiert.

Dr Becquelin het mit em Frédéric Pajak aagfange zämeschaffe, go d Wuchnzytig L’Eternité z illuschtriere. Die isch rund sech Monet lang uusechu. Dr Yyfluss dur dr Pajak, wu in ihm dr ainzig Weschtschwyzer Zaichner gsää het, wu ne Sproch heeb («le seul dessinateur romand à avoir un langage»), het en zum satirische Zaichne broocht. Dr Becquelin het fir d Wuchezytig L’Hebdo vou 1992 bis 1998 dr Cartoon Histoires mécaniques gstaltet, voreb er aagfange het zaichnerisch uf s Zytgschääne yyzgoh.

Noch ere Zyt as Lagerischt in eme Plüschware-Importgschäft un in ere T-Shirt-Druckerei het er vu 1991 bis 2001 uf em Uhredurm vu dr Lausanner Notre-Dame-Kathedrale gschafft – är het all Naacht, zwische 22 un 2 Uhr, d Uhrzyt in allne vier Himmelsrichtige uusgrieft. Die Tradition, wu s syter anne 1405 git, goht uf dr Brandwach zrugg: «C’est le guet, il a sonné dix!» – «S isch dr Naachtwäächter, s het zehni gschlaa!»

Speter het er vum Zaichne chenne lääbe. Anne 1995 het er e Ferderpryys vum Kanton Walli iberchuu un het syt 1998 e ganzi Syte vu dr Zytig L’Hebdo verwantwortet. Syt 2013 het er au fir Sunntigsuusgab vu Le Matin zaichnet. Anderi Engaschmänt het er unter andrem fir d Dageszytig Le Courrier un di italienisch Wuchezytig Internazionale ghaa.

Mix & Remix het anne 2016 an Pankreaschräbs gstorbe. Sy Familie het sy Dod am Morge vum 20. Dezämber mit aim vu syne Cartoon bekannt gmacht («Si hän no drei Monet z lääbe.» – «Drei Monet?!… des isch lang!»).

Wärch (Uuswahl)

• Mekano. Edition Moderne, Zürich 1995, ISBN 3-907010-88-4.
• Institutions politiques suisses, dytsch: Schweiz in Sicht. Lehrmittelverlag, Zürich 2006, ISBN 3-03713-182-9.
• Économie suisse, dytsch: Auf und ab. Lehrmittelverlag, Zürich 2010, ISBN 978-3-03713-401-6.
• Géographie de la Suisse, dytsch: Stadt Land Schweiz. Lehrmittelverlag, Zürich 2013, ISBN 978-3-03713-669-0.
• Swiss Democracy in a Nutshell. Bergli, Basel 2014, ISBN 978-3-905252-65-1.

Weblink

•  Commons: Philippe Becquelin – Sammlig vo Multimediadateie
• Offiziälli Websyte

Fueßnote

Dä Artikel basiert uff ere fräie Übersetzig vu dere Version vum Artikel „Mix_et_Remix“ vu de dütsche Wikipedia. E Liste vu de Autore un Versione isch do z finde.