Museum Tinguely
S Museum Tinguely isch e Kunstmuseum z Baasel. Es isch am 3. Oktober 1996 eröffnet worde und zäigt in ere permanänte Usstellig s Lääbe und d Wärk vom Künstler Jean Tinguely.
| Dialäkt: Baseldütsch |
S Museum lit im Solitudepark am rächte Rhiiufer und isch e Gschänk vo dr F. Hoffmann-La Roche AG an d Stadt und d Region Baasel zum Aalass vom 100-jöörige Jubileum vo dr Firma. Näbe dr permanänte Usstellig finde au Gastusstellige statt vo Fründ vom Tinguely und vo bekannte Künstler.
S Museumsgeböid ändere
Dr Tessiner Archidekt Mario Botta het s Geböid baut. Scho nume in dr zentrale Halle het s Blatz für bis zu zwanzig Wärk vom Tinguely. D Südsite vom Museum isch e lange, hööchere Bau, wo usgseet, wie wenn er nid Däil vom Räst weer. Es isch en Art Promenade über em Rhiiufer, wo dr Bsuecher duure muess und wo si Blick uf e Fluss glänkt wird.
An dr Ostsite het s drei überirdischi Usstelligsetaasche. Dört isch dr höggst Punkt vom Geböid und iiri Fassaade isch wien e Lärmschutzbarriere gege d Stroossebrugg nääbedraa. D Nordsite isch parallel zur Gränzacherstrooss. Do het mä zwüsche dr Strooss und em Museum en überdachte Zuegang zum Park und zum Museum baut. S Museum bestoot us fümf zämmehängende Baukörper, vo dene häi drei groossi Fänsterflechene zum Park aane. Im Innere isch dr Museumsruum dur Wänd iidäilt, wo chönne wäggnoo wärde. D Usstelligsflechene setze sich us vier underschiidlig gstaltete Beriich uf vier verschiidene Stöck zämme. Uf die ersti Etaasche chunnt mä über d „Rhiipromenade“; die isch uf dr äinte Site offe zum Barder aane und uf dr andere si Usstelligsrüüm. Vom Ändi vo däm Gang us chunnt mä uf en anderi Etaasche mit „klassische“ Rüüm. Vo doo us goot s abwärts in en Etaasche, wo drei Meter under em Barder lit und wo d Wärk si, wo d Wirkig von ene nid vom Daagesliecht abhänggt. Am Schluss chunnt dr Bsuecher in s Barder zu de „Monumentalskulpture“. Die stöön im grösste Usstelligsruum vom Museum (30 x 60 m), wo in fümf Beriich cha iidäilt wärde.
D Sammlig ändere
D Sammlig vom Museum stammt von ere grosszüügige Schänkig vo dr Witwe vom Künstler, dr Niki de Saint Phalle, us dr Sammlig vo Roche, us meerere andere gröössere und chliinere Schänkige und us Kauftem.
In dr Sammlig vom Museum si Arbäite us alle Faase und Wärkgrubbe vom Jean Tinguely verdräte. Zämme mit Leihgoobe gäbe si em Bsuecher en umfangriiche Überblick über s Schaffe vom Künstler. Usser de Skulpture het s e Hufe Zäichnige und Briefzäichnige, Dokumänt, Usstelligsblakaat, Katalöög, Dokumentazione und Fotene. Alli Arbäite si – wenn mööglig – öffentlig zuegänglig und wärde regelmäässig in dr duurhafte Usstellig im Museum Tinguely zäigt und au as Leihgoobe in Usstellige uf dr ganze Wält.
Lueg au ändere
Litratuur ändere
- Richard Ingersoll, Sergio Polano, Lutz Windhöfel, Ulrike Jehle-Schulte Strathaus, Jean-Yves Mock u. a.: Mario Botta. Museum Jean Tinguely Basel. Benteli 1997, ISBN 978-3716510803
Weblingg ändere
Commons: Museum Tinguely – Sammlig vo Multimediadateie
|
Dä Artikel basiert uff ere fräie Übersetzig vum Artikel „Museum_Tinguely“ vu de dütsche Wikipedia. E Liste vu de Autore un Versione isch do z finde. |
Koordinate: 47° 33′ 33″ N, 7° 36′ 44″ O; CH1903: 613066 / 267620