Neobarock
Neobarock (au: Nöibarock oder Zwäite Barock) isch d Bezäichnig von ere Stiilrichdig in dr Archidektur, dr Bildhauerei und wird mänggisch au in dr Muusig brucht, au wenn dr richdig musikalisch Stilbegriff Neoklassizismus häisst.
Dr Neobarock isch in dr zwäite Helfti vom 19. Joorhundert verbräitet gsi, vor allem noch 1880. Er gältet as en Erschiinigsform vom Historismus, wo uf elteri Stiilrichdige zruggriffe und die zum Däil au mitenander kombiniert het. In Ööstriich het dr Neobarock e „patriotischi“ Konnotazioon ghaa, wil er an d Kulturblüete und an die politischi Expansion im früeje 18. Joorhundert aaknüpft het.
In dr Archidektuur ändere
In dr Spootfaase vom Historismus isch d Orientierig an d Rönessans, wo zerst vorgherscht het, in Hindergrund dräte und barocki Forme si für alli mööglige Bauufgoobe iigsetzt worde. Im neobarocke Stiil het mä bsundrigs gärn Theatergeböid baut, wil im Barock alli theatralische Kunstgattige ufblüeit si. In sinere Spootfaase het dr Neobarock mit em Juugedstiil koexistiert und dä au beiiflusst.
In dr Bildhauerei ändere
Zur gliiche Zit wie in dr Archidektuur häi au in dr Bildhauerei neobarocki Tendänze afo ufdrätte. As Hauptverdräter vom Neobarock gälte dr Berliner Bildhauer Reinhold Begas und der Wiener Victor Tilgner.
Weblingg ändere
Commons: Neobarocki Archidektuur – Sammlig vo Multimediadateie