Neville Marriner
Dr Neville Marriner, CH, CBE (* 15. April 1924 z Lincoln, Ängland; † 2. Oktober 2016) isch e britische Dirigänt un Gyyger gsii.
Lääbe ändere
Scho mit dryzee het dr Marriner Gyyge am Royal College of Music z London studiert un speter am Pariser Konservatorium. Vu 1950 bis 1959 isch er Profässer fir Gyyge am Londoner Royal College of Music gsii. Ab 1952 het er as Gyyger zum Londoner Philharmonia Orchestra un zum London Symphony Orchestra (LSO) ghert.
Anne 1958 het er zäme mit zwelf Kollege vum LSO s Chammerorcheschter Academy of St Martin in the Fields grindet. Dr Name chunnt vu dr Barockchilche St Martin-in-the-Fields am Trafalgar Square, wu d Academy-Musiker noch em Oobegottesdienscht hän derfe Kunzärt gee. Di erschte Johr sin schwär gsii, vor allem finanziäll. Anne 1970 sin em Marriner sy Schallplatte vu dr Vier Johreszyte vum Vivaldi uusechuu.[1] Syterhär hän är un syni Musiker ai Erfolg noch em andere gfyyrt. Mit sym Orcheschter het er e Huffe Wärch yygspiilt.
Vu 1969 bis 1979 isch dr Marriner Dirigänt vum Los Angeles Chamber Orchestra gsii, derno bis 1986 Musikdiräkter vum Minnesota Orchestra. Vu 1983 bis 1989 het er s Radio-Sinfony-Orcheschter vum Siddytsche Rundfunk glaitet. Anne 1984 het d Academy of St. Martin in the Fields unter sym Dirigat d Filmmusik fir Amadeus yygspiilt.[2]
Fir sýni musikalische Verdienscht het en d Chenigi Elisabeth II. anne 1975 zum Commander of the British Empire ernännt.[3] Dur dr Ritterschlag isch er 1985 Knight Bachelor wore. Syter anne 1990 het er as freie Dirigänt z Europa un in dr USA gschafft. Im Johr 2015 isch er Mitglid vum Order of the Companions of Honour wore. Är het zletscht mit syre zwoote Frau Molly uf sym Landguet in dr Nechi vu Axminster in dr Grofschaft Devon gläbt.[4]
Är isch dr Vater vum Klarinettischt Andrew Marriner (* 1954) gsii. Dr Sir Neville Marriner isch am 2. Oktober 2016 drei Därg no sym letschte Kunzärt z Padua gstorbe.[5]
Literatur ändere
- Christian Tyler: Making Music: Neville Marriner and the Academy of St Martin in the Fields. Unicorn Press, Norwich, 2009, ISBN 978-1-906509-04-0.
Weblink ändere
Commons: Neville Marriner – Sammlig vo Multimediadateie- Gerhard Rohde: Neville Marriner zum Neunzigsten: Dem Werke dienen. Frankfurter Allgemeine Zeitung, 15. April 2014
Fueßnote ändere
- ↑ Decca (6.41377 AG, Label Code: LC 0171) un Argo (Detail do)
- ↑ Amadeus soundtrack uf dr Websyte vu dr Academy of St. Martin in the Fields.
- ↑ Dirigent Neville Marriner gestorben. Zeit Online, 2. Oktober 2016, abgruefen am 3. Oktober 2016.
- ↑ Wolfram Goertz: Besuch bei Neville Marriner: Beim Maestro daheim. Rheinische Post, 5./6. September 2015, S. E1, abgruefen am 2. Oktober 2016.
- ↑ Bernhard Neuhoff: Zum Tod von Sir Neville Marriner: Trauer um britischen Dirigenten. Bayerischer Rundfunk, 2. Oktober 2016, abgruefen am 2. Oktober 2016.
|
Dä Artikel basiert uff ere fräie Übersetzig vu dere Version vum Artikel „Neville_Marriner“ vu de dütsche Wikipedia. E Liste vu de Autore un Versione isch do z finde. |