Norbert Zoller
Dr Norbert Zoller (* 1950 z Raschti-Ottersdorf) isch e dytsche Lehrer un Liedermacher.
Lääbe ändere
Dr Zoller isch z Ottersdorf ufgwagse un het anne 1969 s Abitur am Ludwig-Wilhelm-Gimnasium z Raschti gmacht.
No dr Schuel het er vu 1969 bis 1974 an dr Uniwersideet Fryburg Kadolischi Theology, Gschicht un Soziology studiert. Bis zue syre Pänsionierig anne 2014 het er as Gimnasiallehrer fir Kadolischi Religion, Gschicht un Gmainschaftskund gschafft, zerscht z Charlsrue, ab 1984 derno z Bihl.
Dr Zoller isch ghyrote, het zwai Chinder un wohnt z Lichtenau.
Dr Norbert Zoller het scho ase jung in Beat- un Rockband Gitarre gspiilt un au Folkmusik gmacht. Aafangs 1980er Johr het er aagfange sälber Lieder uf Alemannisch schrybe, im Dialäkt vu sym Haimetdort Ottersdorf, wu am nordweschtlige Rand vum Alemannisch lyt, an dr Gränze zum Sidfränkisch. Är sälber bschrybt sy Dialäkt as „badische Mundart, wobei ‚badisch‘ hier den speziellen Dialekt meint, der südlich von Rastatt im Riedort Ottersdorf gesprochen wird, nicht alemannisch, nicht fränkisch, ein wenig geglättet, um für ein breiteres Publikum verständlich zu sein‘.
Är het in däne rund 40 Johr e Hufe Ufdritt zwische Charlsrue un Offeburg un au im Elsass ghaa mit syne Lieder un dritt au hite no uf. Näbe aigene Lieder singt er au traditionälli Volkslieder us em badische un alemannische Ruum. Är isch mänkmol au scho zäme mit em Otmar Schnurr ufdrätte.
Dr Zoller het bim Dialäktwettbewärb vum „Arbeitskreis Heimatpflege“ im Regierigsbresidium Charlsue, wu syter 2011 „Gnitze Griffel“ haißt, scho ne baar Mol Bryys gwunne mit sälber gschribene Lieder.
Anne 2004 het er im Ikarus Musikverlag unter em Titel „Ä Stick vum Keschdebaum“ e CD mit ere Uuswahl vu syne Lieder vereffetligt.
Dr Norbert Zoller isch Mitglid im Autorennetzwerk Ortenau/Elsass.
Wärch ändere
- Ä Stick vum Keschdebaum. CD, Ikarus-Musikverlag, Bruchsal 2004
Bydreg in Anthologie:
- Mim Deifel donze. In: I riech nix. Prämierte Mundarttexte. Hrsg. Th. Liebscher und Th. Lindemann. Edition Mundart 2009, S. 65.
- Monchmol om Rhi. In: nuffzus, nunnerzus, newedran. Hrsg. Th. Liebscher, Verlag Regionalkultur 2015, S. 76.
Uuszaichnige ändere
- 1983: 3. Bryys bim Dialäktwettbewärb vum „Arbeitskreis Heimatpflege“ im Regierigsbresidium Charlsue mit em Lied „Ä Stick vum Keschdebaum“
- 2002: 1. Bryys bim Dialäktwettbewärb vum „Arbeitskreis Heimatpflege“ im Regierigsbresidium Charlsue mit em Lied „Summerdaa“
- 2009: 1. Bryys bim Dialäktwettbewärb vum „Arbeitskreis Heimatpflege“ im Regierigsbresidium Charlsue mit em Lied „Mim Deifel donze“
- 2011: 3. Bryys bim Dialäktwettbewärb „Gnitze Griffel“ vum „Arbeitskreis Heimatpflege“ im Regierigsbresidium Charlsue mit em Lied „D’r selwe Mond“.
- 2015 3. Bryys bim Dialäktwettbewärb „Gnitze Griffel“ vum „Arbeitskreis Heimatpflege“ im Regierigsbresidium Charlsue mit em Lied Platz mit em, Lied „Monchmol om Rhi“
Weblink ändere
- Websyte vum Norbert Zoller
- Norbert Zoller uf dr Websyte vum Autorennetzwerk Ortenau/Elsass