Dialäkt: Schwäbisch

Notturno Montmartre ischt a Handlongsballett en viir Bildr mit dr Musik vom schwäbischa Kombonischda Hermann Reutter. S Libreddo ond d Choreografii stammet vom Robert Mayer. S erscht Môl uf d Bihne komma isch des Werk am 8. Okdobr 1952 em Graußa Haus vom Wirdabergischa Staatstheatr z Stuegert. Dô drbei send dr Robert Mayer, d Otti Tenzel, d Anneliese Mörike, d Swea Köller, dr Gerd Praast ond dr Hannes d Solischda gwäa. Des Ballett isch zemlich kurz: Obwohl’s viir Uffziig hôt, dauret’s bloß ogfähr a dreivirtl Stond.

Des erschde Wort em Titl vom Ballett ischt Italienisch ond hoißt uff Deitsch Nachtstück.

D Persona vo dr HandlongBearbeite

  • Dr fremde Môô
  • S jonge Mädle
  • A Sengere
  • A Huur
  • A bsoffena Huur
  • A Môô, wo ganz ibrdriiba modisch ôôzoga ischt
  • A Schongleer
  • Deam sei Partnere
  • Vrschiidene Kinschtler
  • Vrkommene Scheniis
  • ond sonscht noh a baar Nebafigura

HandlongBearbeite

Ort ond ZeitBearbeite

Des Ballett schbiilt en Paris zor-a x-beliibiga Zeit.

S Erschde Bild: A StrôßBearbeite

A guat uffglegts Mädle trifft bei-ma Spaziirgang en dr franzeesischa Hauptstadt uff-nen fremda Môô, wo maskiirt ischt ond an ooheimlicha Eidruck uff-se macht. Se probiirt, dean seltsama Kerle mit ihrer guada Laune ôôzstecket, was-se abr et ferdichbrengt. Uff oimôl lôôt dr sell sei Mask falla. Wia-nem nôô des Mädle ens Gsicht guckt, ibrkommt-se s Grausa ond se suacht s Weide.

S Zwoide Bild: Em Café MontmartreBearbeite

Em Café Montmartre tridd zerscht a Sengere uff ond drnôch fihrt a Schongleer seine Konschtstickla vor. A Môô, wo ibrtriiba modisch ôôzoga ischt, schwenzlet rom. Dr Môô mit dr Mask sitzt am Klaviir ond hemmret wia vrruckt uff dia Taschda nei. Sei Schbiil wuud emmr ausglassener ond heert schliaßlich mit-ma hellischa Furioso uff.

S Dridde Bild: Uff-em Place PigalleBearbeite

A baar Huura danzet mit ihre Vorehrer an Tango. Oina vo selle Liabesdinerenna will da Maskiirda vorfihra. Se macht sich an-en nôô ond reißt-em sei Larv vom Gsicht. Dô druff packt-se s Entsetza ond se haut ab.

S Virde Bild: Wiidr uff dr StrôßBearbeite

A zwoits Môl gôht des Mädle uff da Maskamôô zua. Zamma danzet-se an ganz makabra Pas de deux. Wia dr sell rom ischt, packt dr Môô dui Jonga an dr Gurgl ond druckt so fescht zua, bis des Mädle doot zammasenkt.

S Bsondre am WerkBearbeite

Em Robert Mayer, wo et bloß s Libreddo ond d Choreografii gschriiba, sondern bei dr Uruffihrong au da Fremda mit dr Mask danzt hôt, isch bei deam Werk hauptsächlich dô drom ganga, s klassische Ballett mit dr Pandomime zo vrbenda. So stôht zom Beischbiil beim zwoida Bild s Pandomimische em Vôrdrgrond ond em dridda dr strenge klassische Danz.

QuellBearbeite

Otto Friedrich Regner + Heinz-Ludwig Schneiders: Reclams Ballettführer, 8. Uflag, Stuegert 1980, ISBN 3-15-008042-8

WeblinkBearbeite