Peter Reich vo Riichestäi

Dr Peter Reich vo Riichestäi († 3. Mai oder 6. Septämber 1296), isch vo 1286 bis 1296 Bischof vo Basel gsi.

Härkumft

Dr Peter Reich isch us dr Familie Reich vo Riichestäi cho, wo z Basel aasäässig gsi isch. S isch im Dienst vom Basler Fürstbischof gstande, het säggs Basler Bürgermäister gstellt und het Bsitz im Baselbiet, Sundgau, Elsass und im südlige Schwarzwald ghaa. Si Vater, dr Heinrich Reich zu Riichestäi, isch 1258 Bürgermäister vo Basel gsi, si Unggle Rudolf 1262.

Lääbe

Er wird zum erste Mol 1258 as Doomheer z Basel erwäänt, vo 1264 aa isch er Archidiakon am Basler Münster gsi, 1272 Choorheer z Saint-Ursanne und 1274 Lütbriester zu St. Theodor im Chläibasel. 1274 het en s Domkapitel zum Bischof vo Basel gweelt, dr Babst Gregor X. het d Waal aber nid bestäätigt und iin zum Doombrobst z Mainz ernennt. Dr Heinrich vo Isny isch anstatt vom Reich Basler Bischof worde. 1278/79 het dr Reich z Bologna studiert. 1286 isch er zum Erzbischof vo Mainz gweelt worde. Das Mol isch s dr Babst Honorius IV. wo d Waal nid anerkennt het, und dr Heinrich vo Isny zum Erzbischof ernennt het. Dr Reich isch stattdesse zum Bischof vo Basel ernennt worde. As Bischof het er dr Usbau vom Münster gförderet, het de Bürger vo Delsbärg und Laufe d Rächt und Freihäite vo Basler Bürger gee und het d Basler Zümft iiri Rächt bestäätigt. Im Komflikt mit em Rainald vo Mömpelgard het en 1289 dr Köönig Rudolf I. understützt, het d Stadt und d Burg Pruntrut, won denn im Bsitz vo de Mömpelgarder, aber früener emol e Lääche vom Fürstbischof vo Basel gsi isch, eroberet und em Bischof zrugggee. Dr Peter Reich siinersits het em Köönig Adolf vo Nassau 1293 bi dr Belaagerig vo Colmar ghulfe.

Dr Peter Reich vo Riichestäi isch 1296 gstorbe und isch im Basler Münster begraabe.

Litratuur

• Brigitte Degler-Spengler: Peter Reich von Reichenstein. In: Neue Deutsche Biographie (NDB). Band 20, Duncker & Humblot, Berlin 2001, ISBN 3-428-00201-6, S. 219 f.

Weblingg

• Romain Jurot: Reich von Reichenstein, Peter. In: Historisches Lexikon vo dr Schwiiz.
• Peter Reich von Reichenstein uf www.altbasel.ch

Vorgänger Heinrich IV.

Bischof vo Basel 1286–1296

Nochfolger Peter II. vo Aspelt

Dä Artikel basiert uff ere fräie Übersetzig vum Artikel „Peter_Reich_von_Reichenstein“ vu de dütsche Wikipedia. E Liste vu de Autore un Versione isch do z finde.