Pierres du Niton
D Pierres du Niton (»Neptunstai«) sind zwee Felsblöck im Gemfersee am Iigang vom Hafe vo Gemf. Di baide erratische Blöck us Granit sind i de letzte Iiszitt vom Rhônegletscher anetrait wore.
Name ändere
De Name vo de baide Stai isch nöd aihaitlich und si werdet entweder Pierres-à-Niton, Pierres à Niton, hüüfiger aber Pierre du Niton gnennt. De Name bidütet »Neptunstai«, e Hiiwiis druf, as de Stai i de Antiki möglicherwiis em Wassergott Neptun gwait gsii isch. D Vereerig vo dem am Genfersee isch för d Römerzitt guet bilait, wie Inschrifte us Gempf und Losann zaiget. Z Vevey isch zudem no e Statue vom Neptun gfunde wore. Bis i d Noizitt ine isch au d Saag vomene Wassergaist mitem Name Nuiton oder Neton am Gemfersee umegange.
Die Stai sind aber scho i de Bronzezitt Objekt vo de Vereerig gsii und s sind zwai chliini Bronzebieli und e Chupfermesser us dere Zitt gfunde wore. Au e künstlichs viereggigs Loch ufem grössere Stai, isch för kultischi Zweck abrocht wore.
—R.P.N.— ändere
De Guillaume-Henri Dufour het de grösseri Fels as Uusgangspunkt för sini Landcharte bruucht um d Höchi z bistimme. Er het e Bronzetafle mit de Zaiche —R.P.N.— ( Repère Pierre du Niton ) aabroocht und d Lini exakt mit 376,86 m definiert, wamer hüt »Alte Horizoont« nennt. D Düfourcharte und au d Siegfriedcharte basieret ufem Alte Horizont, wo de mittler Pegel vom Mittelmeer z Marseille as Uusgangspunkt gha hät.
Ane 1902 isch ahand vo noije Messige d Lini mit 373,60 Meter öber Meer bisitimmt wore, wamer »Noije Horizonnt« nennt. Die Definition, wo de mittler Pegel vo vier Meer-Aachlüss (Rhy, Inn/Donau, Tessin/Po, Rotte/Rhone) as Uusgangspunkt hät, isch no hüt gültig.
Weblink ändere
Commons: Pierres du Niton – Sammlig vo Multimediadateie