D Potnia (mykenischpo-ti-ni-ja "Herrin" isch e mykenischi Göttin gsii. Si isch uf mykenische Täfeli vo Thebe, Mykene, Pylos und Knossos bikannt. Z Pylos isch si nebetem Poseidāhōn di wichtigst Gotthait gsii. Vermuetli sind verschidnigi Göttine mit dem Name gmaint. Bim Homer isch s Wort potnia (πότνια) "Herrin" de Titel vo merere Göttine, Athenaie, Here, Hebe und Artemis, aber kann Aigename me, wi ide mykenische Zitt.

Z Knossos sind d Athānās Potnia (a-ta-na po-ti-ni-ja) "Herrin vo Athen" und d Daburinthohio Potnia (da-pu2-ri-to-jo po-ti-ni-ja) "Herrin vom Labyrinth" öberliferet. Die erst maint natüürli d Stadtgöttin Athene vo Athen, di zwoot isch noch de gloifigste Interpretation am beste mit de Ariadne gliichzsetze, wo e Töchter vom kretische König Minos isch und em Theseus e Chlüngel us roote Wule ggee hett, demit er wider usem Labyrinth zruggfindet, woner de Minotauros töödt hett.

Z Mykene isch d Sītōn Potnia (si-to-po-ti-ni-ja) "Herrin vom Chorn" vereert wore, wo woll identisch mit de Chorngöttin Demeter isch. Die isch uf de Insle Sizilie vo griechische Sidler au Sito (Σιτώ) "Chorn" gnennt wore.