Röömischi Wasserleitig vo dr Ergolz uff Augusta Raurica

Die röömischi Wasserleitig vo dr Ergolz uff Augusta Raurica isch en Kanal us der Röömerzyt. Me het au scho gseit, es sig s lengschte röömische Bouwäärch im Piet vo dr hütige Schwiiz.

Me het d Leitig am Afang vom erschte Joorhundert noch Chrischtus gmacht zum Wasser us der Ergolz i die röömischi Stadt Augusta Raurica z bringe. Der Kanal foot uf em Bann vo der hütige Baselbieter Stadt Lieschtel aa und lauft rächts vo dr Ergolz s Tal zdurabb und uff Augscht. Dr grööschti Teil vo dr Leitig, wo öppe sächsehalb Kilometer lang isch, lyt underem Bode. Es isch es ganz usgmuurets Bouwäärch mit eme runde Innegwölb, wo i der antike Zyt öppe vierezwänzgstuusig Kubikmeter Wasser drduur i die römischi Stadt gloffe sind. Wo’s im dritte Joorhundert mit dr Stadt Augusta Raurica wäge den Alemanne iirnen Agriff nodisno nidsi gangen isch, het men au die Leitig nümme pflägt und si het mit dr Zyt ufghört funkzioniere.

Sid em sächzääte Joorhundert het men uf de Fälder und spöter bi Bouarbete i de Gmeinde dr Kanal gseh, und si isch bis jetz an öppe füfzg Stelle gnöier undersuecht. Z Lieschtel het men em underirdische Gang Heideloch gseit, was au dr Fluername vom ene Platz bi der Stadt und de vommene Stadtkwartier gää het; dä Naame chunt scho anne 1329 in ere Urkunde vor.

Es Stuck vom Gang chame bi Lieschtel no hüt go aluege.

Literatur ändere

  • Jürg Ewald, Martin Hartmann, Philippe Rentzel: Die römische Wasserleitung von Liestal nach Augst. Liestal 1997.
  • Jürg Ewald: Die römische Wasserleitung von Liestal nach Augst. In: Jürg Ewald/Jürg Tauber (Hrsg.): Tatort Vergangenheit. Ergebnisse aus der Archäologie heute. Basel 1998, ISBN 978-3-909164-62-2, S. 211–220.