S Reprodukzioonssüstem

S Reprodukzioonssüstem vo Gwääbdier umfasst alli Organ, wo für d Fortpflanzig doo si.

Schematischi Darstellig vom Reprodukzioonssüsteem von ere Blüetepflanze:
1. Blüetebode/Receptaculum
2. Chelchbletter/Sepalen
3. Chronbletter/Petalen
4. Staubbletter/Stamina
5. Fruchtbletter/Karpelle

Bi Lääbewääse, wo sich gschlächtlig fortpflanze, si das die primäre Gschlächtsorgan. Dorum git s bi deene, andersch as bi andere Körpersüsteem, groossi Underschiid zwüsche de verschidnige Gschlächter bi de Organ, wo inwolwiert si.

S Reprodukzioonssüsteem vo Dier

D Gamete wärde in Gonade broduziert, wo au Hormon usstoosse und eso d Reprodukzioon reguliere. Bi Männli si das d Hoode und bi Wiibli d Äierstöck. Zum Reprodukzioonssüsteem ghööre au Organ, wo d Gamete zämmebringe, so dass e Befruchdig cha stattfinde. Bi dr üssere Befruchdig brucht s bi bäide Gschlächter vor allem Läiter, wo d Gamete in d Umwält spediere, wo si chönne ufenander dräffe. Bi dr innere Befruchdig wird d Äizälle an en Ort im Innere vom Wiibli dransbordiert, wo s uf Soome vom Männli wartet. Die Soome müesse in s Innere vom Wiibli cho. Für das het s Wiibli je noch dr Dierart e Wagina oder e Kloake und s Männli macht dr Kontakt zum Wiibli eso äng, wie s sini Organ mööglig mache. Bi vile Vöögel brässt s si Kloake uf d Kloake vom Wiibli, bi de Süüger steckt s si Penis in d Vagina und d Soome wandere zur oder zu de Äizälle in dr oder de Gebärmueter, wo si sich denn noch dr Befruchdig entwigglet und schliesslig usgstoosse wird.

Es git groossi Underschiid zwüsche de Dierarte, wie die Brozäss genau ablaufe und was für Organ Däil drvo si und bi Pflanze und Bilz isch s non emol andersch, aber vilmol git s analogi Brozäss und Organ, wo sä usfüere.

Weblink

 Commons: Gschlächtsorgan – Sammlig vo Multimediadateie