D Resolution 3379 vo dr UN-Generalversammlig

D Resolution 3379 mit em Ditel „S Usmerze vo allne Forme vo dr Rassediskriminierig“ (änglisch: Elimination of all forms of racial discrimination) isch am 10. Novämber 1975 vo dr UN-Generalversammlig beschlosse worde. Si sait, ass dr Zionismus e Form vo Rassismus und dr Rassediskriminierig siig. Drezue het si Israel in e Reihe gstellt mit de Apartheid-Staate Südafrika und Rhodesie.

Charte zum Abstimmigsverhalte bi dr Resolution 3379

D Resolution isch mit 72 zu 35 Stimme bi 32 Enthaltige aagnoh worde. D Jo-Stimme si im Wäsentlige vo de arabische Länder, vo Staate us dr Dritte Wält und vom Ostblock (u. a. dr Sowjetunion und dr Dütsche Demokratische Republik) choo. Die meiste westlige Länder (u. a. d USA und d Bundesrepublik Dütschland) hai gege d Resolution gstimmt. D USA hai die Resolution as offizielli Begründig für ihre Boykott vo de erste beide UN-Rassismuskonferänze in de Johr 1978 und 1983 agee.

Nochdäm dr Ostblock zsämmebrochen isch, isch die umstrittene Resolution am 16. Dezämber 1991 vo dr UN-Generalversammlig mit 111 zu 25 Stimme bi 13 Enthaltige zrugggnoh worde (Resolution 46/86). Kei arabische Staat het für s Zruggneh gstimmt. 1998 het dr UN-Generalsekretär Kofi Annan d Resolution 3379 as e „Diefpunkt“ in dr Gschicht vo de Vereinte Natione bezeichnet. S israelische Ussenministerium het erklärt, ass Israel si Deilnahm an dr Madrider Friidenskomferänz 1991 vom Zruggneh vo dr Resolution abhängig gmacht haig.

Weblingg

• UN-Resolutione vo dr 30. Sitzigsperiode 1975, mit eme Lingg uf dr Text vo dr Resolution 3379 (änglisch)
• UN-Resolutione vo dr 46. Sitzigsperiode 1991, mit eme Lingg uf dr Text vo dr Resolution 3379 (änglisch)

Dä Artikel basiert uff ere fräie Übersetzig vum Artikel „Resolution_3379_der_UN-Generalversammlung“ vu de dütsche Wikipedia. E Liste vu de Autore un Versione isch do z finde.