Rolex

Rolex isch e Schwitzer Uhremarke, wo z Gänf und z Biu i dr Schwiz härgsteut wärde.

ROLEX SA
Unternähmensform	Société Anonyme
Gründig	1905
Sitz	Gänf, Schwiiz
Leitig	Bruno Meier (CEO) Bertrand Gros (VR-Präsident)
Mitarbeiter	öbbe 5'800 (2006)
Umsatz	öbbe 2,9 - 3,0 Mrd. CHF (2006)
Branche	Uhremanufaktur
Produkt	Uhre
Uffdritt im Netz	www.rolex.com

Ursprung und Positionierig

Rolex-Gebäud z Biel-Bienne

E Rolex isch im mittlere und im obere Prissegmänt agsidlet: e tüpische Uhr choschtet zwüsche viertuusig und zwänzgtuusig Franke – aber d Priise si oben offe. Di genaue Verchoufszahle wärde nid veröffentlicht, me geit aber derfo us, das so öppe 800,000 Uhre pro Jahr verchoufft wärde. Ds Unternäme beschäftigt z Gänf 5000 Agschteuti, z Biu 2000.

E Rolex isch im Luxussegmänt aagsidlet u wird oft aus Statussümbou aagseh. Si gnüsse ne sehr e guete Rueff bezüglich Gnauigkeit; ihri Uhrwärch si i dr Regu nid sehr kompliziert, defüür aber umso zueverlässlicher.

Dr Ursprung vom Name Rolex isch nid ganz klar. Me munklet, dass es vo "horlogerie exquise" chunt (so öppis wi "usserordentlichi Uhrmacherkunscht"). Dr Name „Rolex“ isch am zwöite Juli 1908 hingerleit worde, das heisst, dass dr Name im Jahr 2008 hundertjärig worde isch.

Dr Grossteu vo Uhrwärch wärden z Biu im Kanton Bärn härgeschteut. Dr Räscht vo dr Uhr wird z Gänf hergeschteut: ds Armband u dr Uhrchaschte in Plans-les-Ouates, ds Zifferblatt in Chene-Bourg, u ds Zämesetze vo dr Uhr wird in Acacias bim Houpsitz gmacht.

Aui Rolex chöme mit emene COSC Zeritifikat. D Rolex steut usschliesslich mechanischi Uhre här und het sech dür das starch i däm Gebiet posizioniere chönne.

Uhre

Grundsätzlich wärde d Rolexuhre i zwöi Kategorie iteut: d'Rolex "Oyster" u d'Rolex "Cellini" (sprich /ʧɛlːiːni/). Technisch gseh isch d Tudor-Uhremarge äbefaus e Linie innerhaub vom Rolex-Unternäme, die wärde auerdings separat vermarktet u treit weder e Chrone no dr Name Rolex uf dr Uhr.

Tudor

Armbanduhr Tudor Prince Date Day, Ref.: 76200

D Tudor isch d Ischstigsmarge für Rolex ; ä tüpische Tudor bechunnt me für tuusig oder zwöitusig Franke. Die Uhre wärde nid zu hundert Prozänt vo Rolex härgsteut: bispiuswis het si nes ETA-Uhrwärch, was ihre nidrigere Pris erklärt. Die extern ikoufti Uhrwärch wärde auerdings no nachbearbeitet.

Cellini

D Cellini isch d Linie mit de Uhre im hoche Segmänt (Prise si gägen obe meh oder weniger offe). Die letschti nöiji Uhr i dr Cellini-Linie isch d Prince, mitemene viereggige Uhrwärch. D Cellini-Linie isch ender e chlini Linie, d'Rolex het sech hie nid hundertprozäntig positionniere chönne und kämpft mit andere Uhremargge.

Oyster

Yachtmaster

D Oysterlinie het sich ganz starch positionniere chönne und isch dr Houptpfiler vo Rolex. D'Uhre, und insbsundere d'Uhrwärch hei sech aus bsunders zueverlässig und robuscht bewise chönne. Jede Uhrwärch-Typ treit e Nummere, bispiuswis "2230". Us dere Zau cha mer abläse, was das für es Uhrwärch isch. Zum Bispiu seit di erschti Ziffere, ob es sich um e Dameuhr (2), e Herreuhr (3) oder äs Sportmodäu (4) handlet. Di andere Zahle gäbe t'Generation, Spezialfunktione und andere Informatione. Ds bekantischte Uhrwärch isch ds 3130, wo oftmaus aus ds'zueverlässlechschte Kaliber überhoupt agseh wird.

Verschidene Uhretüpe i dr Oysterkategorie si di fougende :

• Day-Date
• Day-Date II
• Turn-o-graph
• Datejust
• GMT-Master 1
• GMT-Master 2
• Submariner (bekannti Toucheruhr, Kaliber 3130 oder 3135)
• Sea-dweller (Kaliber 3130)
• Submariner Deep-sea (bis 3900m wasserdicht)
• Daytona (Kaliber 4130)
• Yachtmaster 1
• Yachtmaster 2 (mit Countdownfuntion, Kaliber 4160)
• Milgauss (Kaliber 3131)
• ...

Weblink

• Rolex offizielli Site
• Rolex awards jährlich vergäbeni Prise