Russischi Awangarde

Mit em Begriff Russischi Awangarde wird e künstlerischi Epoche z Russland bezäichnet, wo vo öbbe 1905 bis 1920 gangen isch.

Wääse

Im Kasimir Malewitsch si Holzfeller (1912-1913)

Die russischi Awangarde isch e Prozäss vo dr Revoluzionierig und Ernöijerig in alle Beriich vo dr Kunst z Russland gsi. Uf dr äinte Site het si sich an de nöiste franzöösische Kunstentwicklige gorientiert, andrersits het si sich mit iire änge Bezüüg zur bildnerische Volksdradizioon identifiziert. Alli Künstler us dere Epoche häi welle e Sünthese mache us volksdümlige Elemänt, modärne Ströömige und dr zitgmäässe Tendänz zur Abstrakzioon. Mä het brobiert an die technische Errungeschafte vo dr domoolige Zit aazchnüpfe. Zwüsche de westlige Iiflüss und de östlige Dradizioone isch so e Kunst vo groosser Souveränidäät entstande. Begriff wie Konstruktivismus und Revoluzioonskunst häi die Entwicklig brägt.

As erste Höhepunkt vo dere Epoche wird d Usstellig „Egge-Buur“ im Joor 1911 definiert. Die Usstellig ischvo de Künstler Aristarch Lentulow, Michail Larionow, Kasimir Malewitsch und Natalia Gontscharowa dräit worde. 1912 isch d Usstellig „Eselschwanz“ organisiert worde.

Die bolschewistischi Kultuurbolitik het die Entwicklig am Aafangs gförderet. Dr Suprematismus, wo dr Malewitsch entwicklet het, isch e zitlang noch dr Oktoberrevoluzioon vo 1917 sogar en Art Massenagitazioonsmiddel gsi. Dr Malewitsch und dr El Lissitzky häi Leerstüel an dr Moskauer Kunsthochschuel überchoo. Die Russische Awangardiste häi die nöije kommunistische Herrscher drbii as Förderer und Wäägberäiter vo dr awangardistische Kunst aagluegt.

Wo dr Stalin an d Macht cho isch, isch dr theoretischi Aasatz vo de Awangardiste nüme mit de bolitische Fordrige noch ere Funkzionaale Kunst zämmegange. Im Malewitsch het mä verbote uszstelle und z publiziere. D Komponiste si dank iirem Sammle vo Volksmuusig bi de Ethnie vo dr Sowjetunion nid verfolgt worde. Anderi Künstler si in dr Weste gflüchdet. E Zit vo zentral gstüürter Agitazionskunst, wo au as Sozialistische Realismus bezäichnet wird, het aagfange.

Bildendi Kunst

Under de vile Künstler vo dr Russische Awangarde si dr Chagall, dr Kandinsky, und dr Malewitsch die bekanntiste gsi. Wääred dr Kandinsky s Gäistige in dr abstrakte Kunst gsuecht het und das in sine Bilder het welle zum Usdruck bringe, isch dr Malewitsch mit siner geometrische Formesprooch nööcher zum Suprematismus gsi. Bäidi häi d Äinhäit vo dr Wält welle usdrucke. D Ideä vo dr Theosofii und vom Rudolf Steiner häi vor allem s Wärk vom Kandinsky beiiflusst.

In dr Liddratuur

Dr wichdigsti literarischi Verdräter isch dr Andrej Belyj gsi. Er isch vom Solowjow und Nietzsche beiiflusst worde und zelt zu de Gründer vom Sümbolismus in dr russische Liddratuur.

Muusig und Film

Zur Russische Awangarde häi au Filmbroduzänten wie dr Dsiga Wertow ghöört. Au Verdräter von ere nöije Muusig wie dr Arseni Michailowitsch Awraamow, dr Michail Wassiljewitsch Matjuschin und dr Alexander Mossolow häi d Awangarde brägt.

Liddratuur

• Hans-Peter Riese: Von der Avantgarde in den Untergrund. Texte zur russischen Kunst 1968–2006. Wienand Verlag, Köln 2009. ISBN 978-3-86832-017-6
• G. F. Kovalenko,(Hrsg.): The Russian Avant-Garde of 1910–1920 and Issues of Expressionism. Nauka, Moskau 2003
• Jewgeni Kowtun: Russische Avantgarde. Sirocco, London 2007
• Uwe M. Schneede (Hrsg.), Chagall, Kandinsky, Malewitsch und die russische Avantgarde, Hatje, Ostfildern, 1998

Cds zur Muusig

• Baku: Symphony of Sirens,; Sound Experiments in the Russian Avantgarde 1910 - 1942; Original Documents and Reconstructions of 72 Key Works of Music, Poetry and Agitprop; Produzenten: Miguel Molina Alarcón, Leopoldo Amigo; ReR Megacorp, RAG 1 & 2 ISBN 978-0-9560184-0-3

Dä Artikel basiert uff ere fräie Übersetzig vu dere Version vum Artikel „Russische_Avantgarde“ vu de dütsche Wikipedia. E Liste vu de Autore un Versione isch do z finde.