D' SBB Re 4/4 IV, die vierti Re 4/4 vu de Schwiizerische Bundesbahne, isch ä Schnällzugsloggi wu cha mit 160 Stundekilometer fare.

SBB Re 4/4IV
SBB Re 4/4IV

SBB Re 4/4IV 10101
Bedriib
Baujohr 1982
Bedriibsnummere SBB 10101 – 10104
Stückzahl 4
Isatzgebiet Universallokomotive
Personeverkehr
Verkauf an SOB 1995–1996
Bedriibsnummere SOB UIC: Re 446 015
– Re 446 018
Wartigswärk Samstagere
Technischi Date
Fahrzügtyp elektrischi Lokomotive
Hersteller SLM Winterthur
BBC Baden
und Werk Oerlikon
Achsefolg Bo'Bo'
Höchstgschwindigkeit 160 km/h
Leistig 5050 kW
Stundezugkraft 210 kN
Afahrzugkraft 300 kN
Mäss und Gwicht
Lëngi über Puffer 15'800 mm
Breiti 2950 mm
Höchi 4000 mm
Gwicht 80 t
Sustigs
Bsunderi Merkmol Ersti Thyristorlok
der SBB
Vorgänger SBB Re 4/4 II
Nochfolger Re 450, Re 460

I de Sibzgerjahr hend d' SBB aagfange, im Uuftrag vum Parlamänt ihres Aagebot z' erwiitere und somit s' Projäkt „Bahn 2000“ in Aagriff z' nii. D' Zyyt isch nuch nüd riif gsi für ä richtigi Hochgschwindigkäitsloggi wu cha mit mindeschtens 200 Stundekilometer fare. Bim violett-gäle Vorortstriebzug SBB RABDe 8/16, wu's uf d'r rächtsuufrite Züriseelinie iigsetzt hend, isch äs eerschts Mal d' Gliichrichtertechnik zum Iisatz choo, het aber denn scho technischi Problem beräitet. D' SBB hend aber gliich d'r Schwiizerische Loggi- und Maschinefabrigg (SLM) in Winterthur und d'r Brown, Boveri & Cie. z' Badä vier Prototype vu d'r künftige Re 4/4 IV in Uuftrag ggii. Zum Gwicht spare het mer sich für ä Konstrukziuu us Liechtstahl entschide. So isch dänn ä äinzelni Loggi 80 Tonnä schwär wordä. Im April 1982 het di eerscht vu allne Re 4/4 IV, d' 10101, im Häitersbärgtunnel ihri Probefahr absolviert. Det het si 175 Stundekilometer erreicht und het denn dur das dörfe mit 160 fare. Das het mer duezmal aber nur im Wallis chänne, uf d'r schnuergraade Schnällzugslinie, und so händ's ihres Iisatzgebiet vor allem zwüsche Gämf und Domodossola gchaa. Isch äini uusgfalle, isch si dur ä SBB Re 4/4 II oder ä SBB Re 6/6 abglöst wordä. Ufgrund vu ihrer chline Aazahl sind's immer Exote blibe, und das nüd zur Freud vum zueschtändige Bahnpersonal, wu het müese de Betrieb reglä oder i d'r Werkstatt a de Loggene schaffe.

Im Füfenünzgi hend d' SBB mit d'r Südostbahn äs Tuuschgschäft gmacht - d' Re 4/4 IV sind gäge vier Re 4/4 III a diä Privatbahn übereggange. Churz druf het mer si chänne uf em Stammnetz vu d'r Südostbahn gsii. Duezmaal het diä Bahn zäme mit d'r SBB und d'r Bodäsee-Toggäburg-Bahn de Vorälpä-n-Express gschtellt. Vor dem chänd di ehemalige Re 4/4 IV als SOB Re 446 vor allem zum Iisatz, au ietz, wu d' Südostbahn mit d'r Bodäsee-Toggeburg-Bahn fusioniert het.