D Savognin Bergbahne AG isch es Schwiizer Verchersdienschtleischtigs- und Tourismusundernähme. D Aktivität konzentriert sich uf d Region Savognin/Riom-Parsonz im Kanton Graubünda. Si umfassed d Bereich Bergbahnbetrieb und Gaschtronomie. S Undernähme beschäftiget rund 30 Jahres- und 80 Saisonmitarbeitendi[1] und het im Gschäftsjahr 2013/2014 än Umsatz vo 8.76 Millionä Frankä[2] erwirtschaftät.

Savognin Bergbahnen AG
Logo
Unternähmensform Aktiegsellschaft
ISIN CH0002134473
Gründig 1962
Sitz Savognin, Schwiiz
Leitig

Manuela Seeli
(Gschäftsfüererin)
Markus Schröcksnadel
(Verwaltigsraatspresidänt)

Mitarbeiter 110
Umsatz 8.76 Mio. CHF
Branche Verchehr, Tourismus
Uffdritt im Netz www.savogninbergbahnen.ch

D Savognin Bergbahnen AG isch a dr Schwiizer Börsä SIX Swiss Exchange kotiert. 51 Prozänt vo dr Aktiä besitzed dä Markus Schröcksnadle und d Brüädärä Anton und Peter Schmidl. D Familiä Schröcksnadel und Schmidl händ in Savognin glichgrossi Aateil.

Tätigkeitsgebiet ändere

Dr Bergbahnbetrieb isch s Hauptgschäft vom Undernähme und stüüret rund 6 Millionä Franke in Umsatz inä.[2] Dr Winterbetrieb bildät mit rund 225 000 Erschtiitritt s Hauptgschäft (50 000 im Summer).[2] Dr Rescht wird durs Gaschtronomieagebot (2 Reschtaurants und 1 Schneebar) erreicht.

S Undernähme betriibt insgesamt 13 Alaage: ei Gondelbahn, zwei Sesselibahnä, vier Schiilift (dadevo zwei Doppelschiilift), ei churzi Standseilbahn, zwei Chlini Schiilift und eis Laufband (Zauberteppich).

Gschicht ändere

Wo im Jahr 1882 d Gotthardbahn in Betrieb gno wordä isch, händ villi Passstrasse wo als Nord-Süd-Verchersachsä dient händ a Bedütig verlorä. Das isch vilnä Bergdörfer so gangä (dä Verluscht vo dr Exischtänzgrundlag), drunder au em Dorf Savognin. Für dr wirtschaftlichi Ufschwung und gäge d Abwanderig isch drum dr Wintersport entdeckt wordä. S Projekt Wintersport hend damals dr Gmeindskanzlischt Leza Spinatsch und dr Tobias Kuoni starch voratribä.

Gründig ändere

 
Alti Logos vo Nandrò und Savognin Bergbahnen

Am 25. Mai 1962 hät dr Tobias Kuoni d Aktiegsellschaft «Nandrò Ski- und Sessellifte Savognin-Piz Martegnas AG» gründet. Dr Namä Nandrò het s Undernähme vom Val Nandro becho, was es Siitetaal vom Oberhalbstei isch (det isch au s Schiigebiet). Dr Namä Nandrò-Bergbahnen AG Savognin isch bis im Dezember 1998 dr offizielli Name vom Undernähme blibä.[3] Im Summer 1962 het d Nandrò AG ganz ohni Hilf vo Helikopter (die hets damals nonig gä) drü Seilbahne bout:

  • Ei 2er-Sesselbahn vo Savognin uf Tigignas
  • Ein Schiilift vo Tigignas uf Somtgant
  • Ein Schiilift vo Somtgant uf dr Piz Martegnas

Di letschti Aalag isch am 20. Dezember 1962 - 2 Täg vor dr Eröffnig vo dr drüü Bahnä - fertig wordä. Ei Einzelfahrt pro Sektion het im Winter 1963/64 1.50 Frankä koschtät, ei Tageschartä 10 Frankä.[1] I dr Wintersaison sind öpä 196 000 Lüüt beförderet wordä.[1]

Früechi Pionierleischtige ändere

 
Autoufchläber «Mein Ziel Savognin»

I dä folgende Jahr het s Undernähme ä Vielzahl vo wiitäre Pionierleischtige erbracht.[4] Under anderem hets im Jahr 1965 dä erschti automatischi Schnee- und Pischtäbricht igrichtet, het 1969 di längschti Gondelbahn vo dr Wält bouä und het als erschti Feriädeschtination vo dr Schwiiz än Autoufchläber mit de Ufschrift «Mein Ziel Savognin» igfüert. 1973 het d Musigggruppä Peter, Sue & Marc sogar äs Lied mit em Täxt «Mein Ziel ist Savognin» gschribä.[5] 1978 het s Undernähme di erschti Grossbeschneiigsaalag vo Europa bout (ueg unnä), was äm Schiigebiet Schneesicherheit bracht hät. Als Schiigebiet mit dr einzigä Schneealag wiit und breit isch Savognin so zumänä attraktivä Trainingsort für Profischiifahrer wordä. Zwüsched 1983 und 1995 isch s Schiigebiet sogar zum Usträgigsort vo sibä FIS-Doppelveraschtaltigä cho. 1985 het dank dr Schneealag sogar dr Slalom-Weltcup vo dr Damä in Savognin stattgfundä. Z Leysin im Kanton Waadt, wo dr Weltcup eignetlich stattgfundä hetti, hets weder Schnee gha, no hets Schiigebiet über ä Beschneiigsalag verfüegt.

See/Parkplatz ändere

Im Summer 1986 het d Savognin Bergbahne AG zäme mit dr Gmeind Savognin für 2.5 Mio. Frankä ä doppelnutzigsalag See/Parkplatz bout. En Flächi vo 1.4 ha isch teeret worde und dient sither im Winter als Parkplatz für Schneesportler. Im Früelig wird de Parkplatz über en unterirdischi Wasserleitig vonere Quelle gfluetet. Dadebi entstaht en Badesee wo 40-60 m breit und 250 m lang isch. Er het e tiefi vo maximal 2.80 Meter. S Wasser wird via Überlauf id Julia gleitet. Wegem dunkle Teerbode erwährmt sich dä See im Summer schnell uf en agnähmi Badetemperatur. Um de See ume hets zuesätzlich einigi Freiziitagebot (Beachvolleyball, Minigolf, Spielplatz).

Weblink ändere

  Commons: Savognin Bergbahnen – Sammlig vo Multimediadateie

Fuessnote ändere

  1. 1,0 1,1 1,2 Savognin Bergbahnen AG: 50 Jahre Savognin Bergbahnen AG. 1. Auflage. walder,werber werbeagentur, 2012.
  2. 2,0 2,1 2,2 Savognin Bergbahnen AG: 52. Geschäftsbericht 2013/14. 2014.
  3. Savognin Bergbahnen AG uf dr Website monetas.ch. Abgerufen am 11. November 2014.
  4. Pionierleistung, Entwicklungen, Highlights, Auszeichnungen (PDF; 176 kB) Archivlink (Memento vom 23. April 2014 im Internet Archive). Website der Savognin Bergbahnen. Abgerufen am 5. November 2014.
  5. Savogninerlied auf YouTube. Abgerufen 10. November 2014.
  Dä Artikel basiert uff ere fräie Übersetzig vu dere Version vum Artikel „Savognin_Bergbahnen“ vu de dütsche Wikipedia. E Liste vu de Autore un Versione isch do z finde.