D Schlacht vo Myriokephalon

D Schlacht vo Myriokephalon isch en Usenandersetzig zwüschen em Byzantinische Riich und de Seldschuke in Früügie gsi. Si het am 17. Septämber 1176 stattgfunde und d Seldschuke häi d Byzantiner und iiri Verbündete gschlaage.

Schlacht vo Myriokephalon
Deil vo: Byzantinisch-Seldschukischi Chrieg
D Schlacht vo Myriokephalon, historisierendi Daarstellig us em 19. Joorhundert.
Datum 17. Septämber 1176 Ort in dr Nööchi vom Beyşehir-See, in dr hütige Türkei Usgang Seldschukische Siig
Konfliktparteie
Byzantinischs Riich	Sultanat Rum
Befählshaber
Manuel I. Komnenos Balduin vo Antiochia † Johannes Kantakuzenos Andronikos Batatzes † Ompud palatin Leustak wojwode vo Siibebürge	Kiliç Arslan II.
Truppesterki
um 25'000 (möögligerwiis 50'000)	umbekannt
Verlust
umbekannt	umbekannt

Schlachte in de Byzantinisch-Seldschukische Chrieg
Manzikert – Myriokephalon

Vor dr Schlacht

Dr Manuel I. Komnenos het scho Kilikie zruggerooberet und si Macht uf s Fürstedum Antiochia usdeent. Wo denn dr Nur ad-Din vo Aleppo 1174 gstorbe isch und si Noochfolger Saladin sich uf Egüpte konzentriert het, isch dr byzantinisch Kaiser mit ere groosse Armee uf Ikonion (Konya) marschiert.

Die Schlacht

Dr Manuel het öbbe 25'000 Soldate ghaa, drunder Drubbe us em Fürstedum Antiochia und us Ungarn. Im Kiliç Arslan, em Sultan vo Rum, si Armee isch woorschiinlig öbbe gliich grooss gsi. D Türke häi de Byzantiner e Falle gstellt, dr Manuel, wo in dr Noochhuet gsi isch, isch usgrisse und gflüchdet. Si Hauptarmee het kuum chönne kämpfe, wil s so weenig Blatz ghaa het und het sich au nid chönne zruggzie, wil dr Wäg verstopft gsi isch vom äigene Dross. Am Oobe het dr Arslan e Waffestillstand vorgschlaage, wenn d Byzantiner wurde abzie und zwäi Gränzfestige wurde ufgee. Dr Manuel het das aagnoo und isch abzooge

D Folge

Im Manuel sini Chriegsmaschine si verloore gsi und nie me ersetzt worde. Byzanz het aber immer non e Armee ghaa, wo scho churz druf uf em Balkan Chrieg gfüert het. Aber vo denn aa het dr Manuel d Türke nie me aagriffe, und die häi no di no immer mee byzantinischi Gebiet bsetzt.

D Byzantiner häi dr Weste vo Chläiasie no 120 Joor lang chönne halte, bevor die türkische Osmane ganz Chläiasie in dr erste Helfti vom 15. Joorhundert erooberet häi.

Litratuur

• John F. Haldon: The Byzantine Wars. History Press, Stroud 2008, ISBN 0752445650.
• Ralph-Johannes Lilie: Die Schlacht von Myriokephalon (1176). Auswirkungen auf das byzantinische Reich im ausgehenden 12. Jahrhundert. In: Revue des Études Byzantines 35 (1977), S. 257–275.
• Warren T. Treadgold: A History of the Byzantine State and Society. Stanford University Press, Stanford 1997, ISBN 0804726302.

Einzelnachweise

Dä Artikel basiert uff ere fräie Übersetzig vum Artikel „Schlacht_von_Myriokephalon“ vu de dütsche Wikipedia. E Liste vu de Autore un Versione isch do z finde.