Hauptmenü ufmache
Dr Schmiidehoof mit em Standbild vom Isaak Iselin
Dialäkt: Baseldütsch

Dr Schmiidehoof isch e historischs spootgotischs Geböid in dr Altstadt vo Baasel. Es isch s Gsellschaftshuus vo dr Zumft zu Schmiid gsi. Hüte isch dr Hauptstandort vo dr GGG Stadtbibliotheegg Baasel din.

S Geböid isch äins vo de Baasler Kulturgüeter, ao für d Regioon vo Bedütig sin.

GschichtBearbeite

1411 het d Zumft zu Schmiid für 350 Gulde in Gold am alte Rindermäärt wisawii vom Kaufhuus[1] d Liigeschaft kauft, wo emol Begine gwoont häi.

1650 het d Zumft vo dr Stadt s Rächt uf en äignige Brunne überchoo. Dr Meergottbrunne stoot immer no im Hoof vom Geböid, und mä chann en gsee, wemm mä vo dr Gärbergass in Schmiidhoof iine goot.[2]

Im 19. Joorhundert, wo dr politisch und wirtschaftlig Iifluss vo de Zümft abgschafft worde isch, isch au iiri finanzielli Laag schwiirig worde. 1887 het dr Zumftvorstand vo dr Bürgergmäind d Erlaubnis bechoo, iir Zumfthuus an d «Gsellschaft zur Förderig vom Guete und Gmäinnützige in Baasel» z verkaufe. 130'000 Franke het d GGG müesse aaneblettere für d Liigeschaft, und d Renowazioon, wo nöötig gsi isch, het non emol so vil kostet. Vor em Schmiidhoof an dr Gärbergass 24 stoot sit 1891 e dänggmolgschützts Standbild vom Gründer vo dr GGG, em Isaak Iselin.

1970 isch s Geböid für d Zwäck vo dr GGG nüm guet gnueg gsi und mä het sich afo überleege, das eltiste Baasler Zumfthuus, wo no existiert het, abzrisse. Mä het s aber schliesslig doch nume innenooch umbaut und drbii au d Zumft zu Schmiid nid vergässe, wo wider im Bardeer am Rümelinsblatz 4 e Zumftsaal bechoo het mit Wandmoolereie vom Hans Sandreuter.

Vo 2014 bis 2015 isch dr Schmiidehoof renowiert worde.

FuessnooteBearbeite

  1. Dört wo hüte d Hauptbost stoot.
  2. Zunft zu Schmiid uf altbasel.ch. Archiviert vom Original am 4. März 2016; abgerufen am 4. Juni 2016.

47.5569757.5874777777778Koordinate 47° 33′ 25″ N, 7° 35′ 15″ O; CH1903: 611204 / 267373