S Schwizerische Archidektuurmuseum

S Schwizerische Archidektuurmuseum (S AM) befindet sich am Stäinebärg 7 z Baasel im Geböid vo dr Kunsthalle Baasel. Es beschäfdigt sich in wäggselnde Usstellige und Veraastaltige mit de internazional gfüerte Debatte über Archidektuur und Urbanismus und deren iiri gsellschaftspolitische Aspäkt.

D Kunsthalle Baasel, wo au s Archidektuurmuseum dehäi isch

Dialäkt: Baseldütsch

Brogramm

S Museum organisiert im Durchschnitt 4 Usstellige im Joor mit de Brogrammschwerpünkt „Interdisziplinaridäät“ und „Gschicht und Gegewart“. Es richdet sich derbii an Fachlüt wie Archidekte, Ääschenjöör und Blaaner, aber vor allem au an s bräite Publikum, wo sich für Archidektuur intressiert. Zu jedere Usstellig finde Veraastaltige statt, wo sä begläite wie Füerige, Podiumsdiskussione, Workshops und Wärkvordrääg, und s Museum veröffentligt Publikazione us dr S AM-Räije, wo sä reflektiere und ergänze.

Gschicht

S Archidektuurmuseum (AM) isch 1984 uf e brivati Iniziative as Stifdig gründet worde und isch ursprünglig im Domus-Huus din gsi, wo z Baasel zu de sältene Bischbil vo dr modärne Archidektuur us de 1950er Joor zelt und 1958 vom Archidektebüro Rasser & Vadi baut worde isch. Sini Schwerpünkt in deere Zit si uf Schwizer Archidekte us dr Gegewart und dr Vergangehäit glääge und uf Schwizer Archidektuurthemene im allgemäine. Es het aber au monografischi Usstellige über internazionali Archidekte wie dr Rafael Moneo, Frank O. Gehry und dr Rem Koolhaas gmacht.

2004 isch s Museum in d Kunsthalle züüglet, wo drfür umbaut worde isch. 2006 isch us em AM s S AM, s Schwizerische Archidektuurmuseum worde.

Lueg au

• Museum z Baasel

Weblingg

• Website vom Schwizerische Archidekturmuseum

47.5537055555567.5911888888889