S Domus-Huus

47.5559677.589382Koordinate: 47° 33′ 21,5″ N, 7° 35′ 21,8″ O; CH1903: 611347 / 267261

S Domus-Huus isch e modärns Huus im Stiil vom Nöije Baue an dr Pflueggass 3 z Basel. Hüte isch e Buechhandlig für Archidektuur und Disäin din.

Beschriibig

S Huus stoot in sinere Modärnidääd in starkem Kontrast zu de Noochberhüüser in dr middelalterlige Baasler Innestadt^[1] und isch e guets Bischbil für em Le Corbusier sini Ideä vom Domino-Brinzip und vo de Broporzioone us em Modulor.^[2] Es stoot am ene Stroosseegge und het Vorhangfassaade us Glaas und Metall zur Pflueggass und zur Wisse Gass aane, isch säggs Stöck hooch und het e flachs Dach. S Geböid wird nume vo drei runde Betonstütze und ere Brandmuure im Innere dräit. D Fassaade wärde vo de Betonfuessbööde vo de Stöck gliideret und d Verglaasig bestoot zum Däil us grifflete Gleeser, wo vo fiine, schwarze Iisebrofiil festghebt wärde.^[3]

Dr Schwizer Archidekt Martin Steinmann (* 1942) het in sim Ufsatz über Form und Dauer gschriibe, es sig «gwüssermasse durchsichtig» und «zitlos im ene Loos’sche Sinn.»^[4]

Baugschicht

S Domus-Huus isch in de Joor 1958/59 vom Archidektuurbüro Rasser & Vadi as Gschäftshuus baut worde. Domus het dört dänischi Hushaltswaare verkauft. D Konstrukzioon und d Struktur vom Bau si uf die Funkzioon abgstimmt gsi: Über dr durchsichtige Laadewitrine im Bardeer het s fümf Stöck ghaa, und im ooberste isch e Woonig gsi. Dr ganz Laade isch en Art Regal gsi, wo mä het chönne umelaufe din.

1984 het mä s Domus-Huus au wäge sinere klassisch zitlose Modernidäät zum Sitz vom Schwizerische Architekduurmuseum gmacht, und s Geböid eso vor em Abriss grettet. D Renowazioon isch vom Archidektuurbüro Diener & Diener 1984/1985 usgfüert worde. Mä het äigetlig nume müesse d Fassaade butze, d Wänd nöi aamoole und d Boodebeleeg uswäggsle. Mit zuesätzlige Elimänt het mä de Usstelligsrüüm e nöiji Ornig chönne gee. Das si beweegligi Wänd gsi, wo an d Geometrii aabasst gsi si, wo vo de drei Pfiiler vorgee gsi isch. Mä het eso uf em freije Grundriss underschiidligi Beziejigsnetz us Ruum und Struktur chönne ufbaue.^[3]

Bis dass s Architekdurmuseum im Joor 2003 in Rüüm vo dr Kunsthalle züüglet worde isch, häi im Domus-Huus öbbe hundert Usstellige stattgfunde.^[3]

Fuessnoote

↑ N.N.: Eingriffe. Eine Typologie. In: Werk - Archithese. Band 66, Nr. 25–26, 1979, S. 50 f., doi:10.5169/seals-50761.
↑ N.N.: Geschäftshaus in Basel. In: Bauen + Wohnen. Band 14, Nr. 12, 1960, S. 457 ff., doi:10.5169/seals-330502.
↑ ^3,0 ^3,1 ^3,2 Architekturmuseum im Domus-Haus, Basel, 1984–1985 uf dr Website vo Diener & Diener Architekten, abgrüeft am 4. April 2016
↑ Martin Steinmann: Form und Dauer: Notizen zum architektonischen Denken von Roger Diener. In: Werk, Bauen + Wohnen. Band 89, Nr. 1, 2002, S. 20, doi:10.5169/seals-66440.

Dä Artikel basiert uff ere fräie Übersetzig vum Artikel „Rasser_und_Vadi“ vu de dütsche Wikipedia. E Liste vu de Autore un Versione isch do z finde.

[1] N.N.: Eingriffe. Eine Typologie. In: Werk - Archithese. Band 66, Nr. 25–26, 1979, S. 50 f., doi:10.5169/seals-50761.

[2] N.N.: Geschäftshaus in Basel. In: Bauen + Wohnen. Band 14, Nr. 12, 1960, S. 457 ff., doi:10.5169/seals-330502.

[diener-3] 3,0 ^3,1 ^3,2 Architekturmuseum im Domus-Haus, Basel, 1984–1985 uf dr Website vo Diener & Diener Architekten, abgrüeft am 4. April 2016

[4] Martin Steinmann: Form und Dauer: Notizen zum architektonischen Denken von Roger Diener. In: Werk, Bauen + Wohnen. Band 89, Nr. 1, 2002, S. 20, doi:10.5169/seals-66440.

[1]

[2]

[3]

[4]