Schwiizer Saagen us em Aargau

D Schwiizer Saagen us em Aargau sind e Samlig vo Saage, wo dr Ernst Ludwig Rochholz 1856 i zwöi Bänd useprocht het.

Der Aarauer Kantiprofässer het in alne Regioone vom Kanton Aargau und glägentlech chly über d Kantonsgränzen use die alte Gschichte gsamlet, und denn het er se püschelet und uf die zwöi Büecher verdeilt. D Saage sind über beed Bänd durenummeriert, und es het im Ganze 517 Stück drinn. Derby sind vil teils zimlech usfüerlechi sprooch- und kulturgschichtlechi Kommentäär.

Em Rochholz sini Schwiizer Saage sind es monumäntals Wärch ganz am Afang vo dr düütschsproochige Saageforschig, wo churz vorhär mit de Brüeder Grimm irere Märlisamlig und em Basler Germanischt Wilhelm Wackernagel agfange het.

Die meischte Saage het dr Rochholz uf Hochdütsch ufgschribe und publiziert; aber e ganzi Reie sind i dr Mundart i de Büecher abtrukt, also i verschidene Idiom vo de vilfältige Aargauer Tieläkt. So isch das Wärch auf für d Mundartforschig e wärtvolli Grundlaag. Drum sind bim Schwiizerischen Idiotikon d Schwiizer Saage und em Rochholz sini andere wüsseschaftleche Schrifte zu dr alemannische Sproochgschicht verzeichnet.

Kwelle

• Schweizersagen aus dem Aargau, gesammelt und erläutert von Ernst Ludwig Rochholz. 2 Bänd, Suurländer, Aarau 1856.
• Nöiusgabe:
  • Ernst Ludwig Rochholz: Schweizersagen aus dem Aargau. 1 Band, Züri 1980. ISBN 3-283-00030-1
  • Ernst Ludwig Rochholz: Schweizersagen aus dem Aargau. Mit emene Vorwort vom Hans ten Doornkaat, Züri 1989. ISBN 3-283-00030-1