Seeschlacht bi Mänidorf
De Seeschlacht bi Mänidorf isch di letschti grossi Schlacht im Alte Zürichrieg gsi. D Zürcher händ am 29. Oktober 1445 uf em Zürisee bi Mänidorf d Schwyzer gschlage gha. En Waffestillstand häds aber erscht im Juni 1446, en Fride 24. August 1450 gee.
Vor de Schlacht ändere
Eidgenössischi Truppe sind über de See is Züripiet inecho und händ Zürcher Dörfer a bedne Ufer agriffe, zum Täil Hüser aazündt und Fälder und Räbbärg verwüeschted. Mängisch isch d Wümmet nume mögli gsi, wänd d Stadt Züri mit irne Chriegsschiff vor em Ufer patrouilliert häd. Das isch i de erschte Phase vom Zürichrieg passiert und häd mit em Chilchbärger Fride am 1. Dezember 1440 ufghört. Rapperschwil isch aber immer no belageret gsi und häd nume überläbt, wils vo Züri über de See versorget worden isch. Schwyz häd versuecht, das zverhindere.
D Schlacht ändere
Am 29. Oktober 1445 sind d Zürcher mit ire ganze Seemacht gäge Rapperschwil ufe zoge, zum die belagereti Stadt es vierts Mal z verproviantisiere. D Flotte isch 12 Schiff gross gsi: Chriegsschiff und Proviantschiff. Chum händ d Schwyzer d Flotte gse, sind s ere entgäge gfaare. Vor Mänidorf isch es zur Schlacht cho. D Schiff sind inenand ine gfaare und händ versucht sich gägesitig Löcher in Rumpf z schüüsse. De Kampf isch lang unentschide plibe. Da sind d Rapperschwiler de Zürcher z Hilf cho mit de bede Bregänzerschiff, wo si am 24. Septämber vo Habsburg-Öschtriich übercho händ. D Schlacht häd bis am Aabig tuured. D Gans vo Schwyz isch verschosse und am sinke gsi. S grosse Chriegsfloss Bär häd kä Pulver zum schüüsse und kä Stäi zum übererüere me gha und sich au gäge Pfäffike zruggzoge. S zwäite Schiff vo Schwyz, de Kiel, häd bis spat in Aabig ine witerkämpft, wäred en Täil vo de Zürcher scho zwüschetine uf Rapperschwil ufe gfaren isch. Erscht wos ignachted gha häd, isch d Schlacht färtig gsi. D Schwyzer händ beträchtlichi Verlüscht gha: vil Verletzti, und sächzä Toti.
Nach de Schlacht ändere
D Zürcher sind zwe Täg z Rapperschwil plibe und am 31. Oktober wider uf Züri zrugg gfaare. Schwyz isch gschlage gsi und Züri häd de See behärrscht. D Schwyzer händ aber immer no e havarierti Flotte gha. Die händs hinder Hurde gäge Altedorf zu as Land zoge gha. D Zürcher händ befürchted, d Schwyzer würded die über de Winter wider richte und de Striit göchi im nögschte Früelig wider los. Drum isch am Hälig Abig es Komando in Obersee ufe gfare und hät di trochegläiti Flotte vo Schwyz mit Bieli zämegschlage und aazündt. Erscht wo d Bätziitglogge glüüted häd, sind si wider häizu.
Vo dem Schade häd sich Schwyz nüme erholt. De Chrieg uf em See isch färtig gsi. En Waffestillstand häts aber erscht im Juni 1446 gee, en Fride nach lange und komplizierte Verhandlige am 24. August 1450.