Shvetambara

D Shvetambara (skt. श्वेताम्बर, śvetāmbara m. „Wiissgchlaidet“) bildet aini vo de zwoo Sekte vom Jinismus. D Aahänger vo dere Richtig träget wiissi Chlaider, drum de Name, im Gegesatz zu de Digambara wo ganz blutt umelaufet. Debii birüefet si sich uf de 23. Tirthamkara Parshva, wo a de Gloibige fraigstellt het, öb si wien er selber blutt, oder öb si aglait umelaufe wönd. D Shvetambara haltet sich strenger a d Schrifte as d Digambara.

Mönch vo de Shvetambara Jaina

Gschicht

D Shvetambara hend sich vom Ursprungsland Magadha nodisno geg Weste uusbraitet. Di ältiste Inschrifte vo de Jaina stammet us em 2.Jh.n. Chr. und sind bi Mathura a de Yamuna gfunde wore. Im 6. Jh. sind si im indische Land Gujarat bizügt. Hüt lebet di maiste Shvetambara z Gujarat und z Rajasthan. Vili Shvetambara hend de Ruef, ass si gueti Handelslüüt saied.

Büecher

• Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X
• Walther Schubring: Der Jinismus; i Die Religionen Indiens, Bd.III. Stuggart: Kohlhammer 1964.