Schyyinternaat Furtwange

Im Schyyinternaat Furtwange (dt. offizäll Skiinternat Furtwangen Baden-Württemberg GmbH, chuurz SKIF) z Furtwange im Schwarzwald cheme jungi Spitzespoortler*ne vu dr baade-wiirtebäärgische Skiverbänd näb dr Uusbildig an aire vu dr Furtwanger Schuele zuesätzlig au no ne spoortligi Uusbildig iiber. Di junge Spoortler*ne chenne mit rund 15 Joor uf s Internaat, si böue si doo ne beruefligi Zuechumft uf un cheme doo ne individuälli Laischtigsspoortfeerderig in dr Diszipliine Biathlon, Schyylanglauf, Noordischi Kumbinazioon un Schyygumpe. Mit dr berueflige Feerderig näb em Spoort soll verhinderet wääre, ass si di junge Spoortler*ne nume em Spoort widme un no am Änd vu dr Spoortkarrieere vor em berueflige Nyt steen.

Gschiicht

Di eerschte Blään fir s Schyyinternaat vum baadische Spoortfunktioneer Fredy Stober (1910–2010) stammen us dr 1970er-Joor. Ugmacht wooren isch s Internaat anne 1984.

Dr Dytsch Spoortbund het an s Spoortinternaat, wu seli effektiiv un erfolgryych schafftt, anne 1998 s geert Bredikaat vun ere „Eliiteschuel vum Spoort“ vergee. Dr Dytsch Spaarchasse- un Schyyroverband duet mit dr Feerderig vum SKIF e wiichtige Byydraag zue dr Zuechumftssicherig laischte. Anne 2006 isch s Schyyinternaat Furtwange as ain vu 365 Oort uusgweelt woore, wu Dytschland im Rame vu dr Akzioon „Land vu dr Ideeä“ verdrätte hän.

S Internaat isch syt dr Grindig im Don-Bosco-Haim vu dr Salesianer Don Boscos unterbrocht gsii. Wu die zum 30. Septämber 2010 ewäggange sin, isch s Huus vu dr Skiinternat Furtwangen Baden-Württemberg GmbH ibernuu woore, wu d Stadt Furtwange, die Stiftig OlympiaNachwuchs vum Land Baade-Wiirtebäärg un dr Internazionaal Bund IB Aadail hän. S isch e Woonhaim fir Leerbuebe un Leermaidli un Beruefsschueler*ne. Do soorgt dr IB au fir di junge Spoortler*ne, doderzue gheert d Unterbringig un voll Verbfläägig un au di pedagoogis Soorg zue dr Juugedlige.

Spoortligi Soorg

Im SKIF het s verschiideni Trainingsryym un aigeni Biroo fir dr Trainerstaab. Aagstellt sin doo fir e jeedi Disziplin verschiideni Fachtrainer*ne, zmaischt eemooligi Spitzespoortler*ne. In dr Trainingsryym un im Schyyinternaat duet mer s Grundtraining mache. Fir d Feerderig vu dr spoortlige Syte dien au d SBW Leistungssport GmbH un dr Olympiastitzpunkt Fryburg-Schwaarzwald mitwiirke. Dr Olympiastitzpunkt unterstitzt s SKIF mit syne Servicelaischitge im spoortmediziinische un spoortwisseschaftlige Beraich un ere Laufbaanberootig.

Dernääbe trainiere d Spoortler*ne uf verschiidene Trainingsaalaage in dr Regioon, wu vyylmool fir e ganzjeerige Bedriib uusglit sin: z. B. uf dr Sprungschanz z Hinterzarte, uf dr Biathlon-Strecki z Scheewald oder im alpiine Laischtigszäntrum am Fäldberg. Derzue cheme fir d Spoortler*ne je no Kaader (di Beschte gheere zue dr Junioore-Nazionaalmannschaft oder gar zue dr Nazionaalmannschaft in ire Spoortaart) no Leergäng an nazionaal un internazionaale Trainingszäntre.

Schuelischi Uusbildig

Näb dr Spoortuusbildig un Wettkämpf bsueche d Spoortler*ne Schuele am Oort:

• S Otto-Hahn-Gimnaasium mit Realschuel het drei Ziig: e sproochlige, e matemaatisch-natuurwisseschaftlige un e Spoort-Zuug.
• D Robert-Gerwig-Schuel as Beruefsschuel mit ere Staatlige Beruefsfachschuel (doderzue gheert au di vum Robert Gerwig grindet Uurmacherschuel), e Gwäärbschuel, e Beruefskolleeg un e tächnisch un e Wiirtschafts-Gimnaasium.
• Au an dr Hauptschuel sin Schueler*ne vum SKIF.
• Au d Hoochschuel Furtwange chaa bruucht wääre.

D Leerer an dr Schuele versoorge d Spoortschueler*ne, wänn si am Internaat sin, all Daag iber s Internet mit em Schuelstoff. Derzue chunnt no speziälle Feerderunterriicht.

Uusglääseni eemooligi Schueler*ne

• Stefanie Böhler (Schyylanglauf) – Silber bi Olympia 2006 un 2× Viize-Junioorewältmaischteri
• Sven Hannawald (Schyygumpe]) – Schyyfluug-Wältmaischter un Olympiasiiger
• Simone Hauswald (Biathlon) – Junioorewältmaischteri un Europamaischteri in dr Stapfle
• Alexander Herr (Schyygumpe) – Bronzemedaille im Team bi dr Schyyfluug-WM 2006.
• Georg Hettich (Noordischi Kumbinazioon) – Olympiasiiger (Gold, Silber, Bronze) 2006
• Hansjörg Jäkle (Schyygumpe) – Olympiasiiger 1994 im Team
• Frank Höfle (noordische Spoort vu dr Behinderete) – 14× Olympiasiiger bi Paralympics
• Kathrin Hitzer (Biathlon) – zwoofachi Europamaischteri un meefachi Dytschi Maischteri
• Martin Schmitt (Schyygumpe) – Olympiasiiger, 2× Siiger im Gsamtwältcup, 2× Siiger im Schyyfluug-Wältcup un 4× Wältmaischter
• Thorsten Schmitt (Noordischi Kumbinazioon) – Silbermedaille bi dr WM 2003 in dr Stapfle
• Simon Schempp (Biathlon) – Vierfache Wältmaischter, 2× Silbermedaille un 1× Bronzemedaille bi Olympia

Weblink

• Offiziälli Websyte

Fueßnote

48.0473058.213758

Dä Artikel basiert uff ere fräie Übersetzig vu dere Version vum Artikel „Skiinternat_Furtwangen“ vu de dütsche Wikipedia. E Liste vu de Autore un Versione isch do z finde.