St. Elisabethchlooschter Schaa

St. Elisabeth isch e kadoolisch Chlooschter vu dr Aabäterne vum Bluet Chrischti (Adoratrices Sanguinis Christi, ASC) im Schaaner Ortsdail Dux z Liachtaschtaa. S Chlooschter isch anne 1935 grindet woore. Hite (Stand 2019) lääbe do 15 Schweschtere.

Gschiicht

Dr Oorde Adoratrices Sanguinis Christi isch am 4. Meerz 1834 z Italie dur di Hl. Maria De Mattias (1805-1866) grindet woore. Si isch mit 29 Joor as Leereri uf Acuto chuu, e Doorf siidli vu Rom. Si het in dr Region in vyl Bäärgdeerfer Volksschuele grindet un in Stedt heecheri Schuele, vor allem fir Maidli. Am 18. Mai 2003 isch si hailiggsproche woore. D Oordesgmainschaft Aabäterne vum Bluet Chrischti isch anne 1975 vum Paapscht anerkännt woore un het hit rund 1600 Schweschtere in 28 Länder, wu vor allem erzieherischi un sozial-karitativi Ufgaabe ibernäme.

Anne 1845 het d Maria Theresia Weber in Schtäinerbärg im Kanton Schwyz e Gmainschaft fir jungi Fraue grindet, wu s Bluet Chrischti vereert hän. S sin Fraue us em Baadische gsii, wu vor em Kulturkampf, wu z Baade ufezoogen isch, in d Schwyz gflichtet sin. Si hän si 1847 dr italieenische Gmainschaft aagschlosse. Im Joohr 1848 isch d Weber mit grad emol 26 Joor gstoorbe. Dr Oorde het d au d Schwyz mieße verloo, di maischte Schweschtere sin in d [USA] gange, e baar uf Bosnie. Anne 1908 sin d Schweschtere retuur chuu vu Bosnie un hän si zeerscht z Vorarlbärg niidergloo un schließli ab 1920 z Balzers, Liechtaschtaa, im hitige Huus Guetebärg.

1934/1935 isch z Schaa no Blään vum eeschtryychische Architäkt Arthur Wander e neie Chlooschterböu böue woore. D Gmai Balzers het versuecht dr Neiböu un dr Umzuug z verhindere, aber schließli sin 1935 40 Schweschtere uf Schaa in s nei Chlooschter umzooge. Am 22.7.1935 isch s zue Eere vu dr Hl. Familie gweit woore.

D Kapälle isch 1951/52 ufgstockt, anne 1977 inne umböue un 2004 dur dr Architäkt Raimund Hassler renovioert woore.

Dr Oorde vu dr Adoratrices Sanguinis Christi isch in Regione untergliideret, di dytschsproochig Regioon het ihre Sitz im Chlooschter St. Elisabeth z Schaa. D Regioon het (Stand 2019) 32 Schweschtere, wu in zwoo greeßere un drei chlainere Gmainschafte lääbe. Im Chlooschter St. Elisabeth z Schaa lääbe hite 15 Schweschtere, derzue schaffe do nyyn Mitarbeiterne un Mitarbaiter, wu no dr Wiirtschaft vum Chlooschter, em Huushalt un em Gaarte luege. Im Josefsheim z Reetebaa (Dytschland) lääbe nyyn Schweschtere, z Schtäinerbärg SZ lääbe drei Schweschtere un ai Schweschter läbt z Muolen. Derzue git s e chlaini Gmainschaft z Grand Cess im weschtafrikanische Liberia. Vu 1995 bis 2015 het s au ne dytschsproochigi Gmainschaft z Weschtsibirie gee.

D Laitig vu dr dytschsproochige Regioon hän vier Schweschtere, wu anne 2016 vu allne Schweschtere gweelt woore sin:

• Sr. Elisabeth Müller, Reeti un Sekreteeri
• Sr. Judith Kuman, Regionaallaiteri
• Sr. Bärbl Aichele, Reeti
• Sr. Agnes Ramsauer, Ekonoomi

D Schweschtere hän bis Mitti 1990er Joor e Schuel im Chlooschter gfiert. S «Institut St. Elisabeth» isch aafangs im siidlige Dail vum Chlooschter unterbroocht gsii, bis 1956/57 en aige Schuelhuus böue wooren isch. Bis in d 1970er Joor isch dr Unterriicht in dr Chlooschterschuel, dr Unterriicht an Volksschuele, dr Handaarbets- un Huuswiirtschaftsunterriicht, un d Aarbet an Chinderschuele e wiichtige Dail vum Wiirke vu dr Schweschtere gsii. Syt dr Oorde 1994/95 d Dreegerschaft ufgee het, het s Land d Schuel im Chlooschter as Realschuel wytergfiert. Im Mai 2017 het s Land bschlosse, ass d Realschuel us em Chlooschter soll uuszie, wel s Gebei neie Aafoorderige nimi entspricht. Dr Umzuug, wu urspriongli scho im Summer 2019 het sotte stattfinde, isch im Mai 2019 eerscht emol verschoobe woore, bis Uusböumaßnahme im Schuelzäntrum Mühleholz z Vaduz feertig sin. Jetz soll d Realschuel Schaa 2024/25 umzie.

Literatur

• Martina Sochin D’Elia: Sankt Elisabeth (Kloster). In: Historischs Lexikon vom Förschtatum Liachtastaa.

Weblink

• Websyte vum Chlooschter St. Elisabeth