The Body Shop

S Unternähme mit em Name The Body Shop verchauft Schminkartikel und Pflegeprodukt für de Körper und d Haar. The Body Shop isch im Jahr 1976 vo de änglische Dame Anita Roddick, en Mönscherächtsaktivistin, gründet worde. Si isch am 10. September 2007 gschtorbe. Ihres Unternähme hed meh als 2'800 Gschäft i 65 Länder vo de Wält. Im Jahr 2006 isch de Body Shop vom Grossunternähmer L'oreal ufgchauft worde.

Gstell mit Produkt vo The Body Shop

Philosophii

D Philosophii vo The Body Shop bestaht us füf ethische Grundwärt: De gerächti Handel, de Tierschutz, d Sälbstachtig, de Umwältschutz und d Mönscherächt. Alli Kampagne vo The Body Shop sind uf dene füf Grundwärt ufbaut. Es gid en Stiftig wo The Body Shop Foundation heisst und 1990 gründet worde isch. D Foundation dued Gruppe finanziell unterstütze wo die gliiche Ziil verfolged, zum Biispil Mönscherächtsprojekt oder Umwältschutzgruppe.

Tierschutz

The Body Shop macht sini Produkt ohni Tierversüech und isch für das au scho mit em Humane Cosmetics Standard für sini Tierschutz-Politik uszeichnet worde.

Gerächte Handel

De Grundsatz vom gerächte Handel heisst Hilfe durch Handel. Es gaht drum, nachhaltigi Entwickligsprojekt vor Ort z unterstütze und de Handelspartner Löhn z zahle wo ihne de Läbensunterhalt sichered. Es wärdet möglichscht vili Inhaltsstoff für ihri Produkt vo Hilfe durch Handel-Partner gchauft.

Sälbstachtig

The Body Shop leid Wärt uf Produkt wo die natürlichi Schönheit und s Wohlbefinde förderet. Usserdem isch ihri Meinig, dass mer sich au guet cha fühle, wenn mer guets dued und sich für anderi iisetzt. Drum wärdet de Mitarbeiter Möglichkeite für Freiwilligearbeit bote.

Umwältschutz

S Unternähme achtet uf de nachhaltigi Umgang mit de Rohstoff vo dere Wält. S Ziil isch d Umwält mit gschiider Nutzig vo de Energie und Wiederverwändig vo Fläsche und Iichaufstäsche z schütze.

Mönscherächt

Mit Hilf vo Gäldspände wärdet Fraue und Chind über s Thema vo de hüüsliche Gwalt ufklärt. Au de Kampf gäge HIV, Aids und Mönschehandel wärdet vo The Body Shop finanziell unterstützt.

Gründig

D Gründerin isch d Anita Roddick. Sie hed im Jahr 1976 in Brighton z Ängland de erscht Lade vo The Body Shop ufgmacht. Ihre Lade hed immer meh Umsatz gmacht und später sind anderi Filiale uufgange. Sit 1984 isch ihres Unternähme au i de Börse notiert. Ihri Idee isch gsi, mit natürliche Inhalststoff umwältfründlichi Kosmetik z mache. Sie hed sich vo ihrne Erfahrige und Beobachtige vo ihrere Wältreis la inspiriere.

Anita Roddick

Si isch im Jahr 1942 uf d Wält cho und z Ängland ufgwachse. Nach ihrere inspirierende Wältreis hed sie in Brighton de erst The Body Shop eröffnet. Sie isch die Ersti gsi wo umwältfründlich verpackti Kosmetikprodukt verchauft hed, wo ohni tierversuech gmacht worde sind und nur natürlichi Sache drinn gha hend. Sie isch au die Ersti gsi wo im Einzelhandel gschaffed hed und uf ethischi Wärt gluegt hed. Mit ihrem Iisatz gäge Tierversüech hed sie grosse Respäkt vo de PETA becho.

Produkt

D Produkt wo The Body Shop verchauft sind sehr vielfältig. Sie gönd vo Schminkartikel über Parfum zu Haarshampoo, Körpercreme und Duschmittel. Es gid Artikel für Fraue sowie au für Männer. Au d Düft sind sehr abwächsligsriich. Sie sind fruchtig wie Ärdbeeri, frisch wie Zitrone, eher natürlich wie Sheabutter oder Olive oder au sehr usgfalle wie Hanf. S Sortiment wechslet immer wider und es gid jewiils passendi Kollektione vo neue Produkt zu de Jahresziite.

Schwiiz

De erst Lade vo The Body Shop Switzerland isch in Züri und es gid ne sit 1976. I de Schwiiz gids jetz öppe 37 Filiale. D Schwizer Zentraalè vo dè Body Shop isch z Uschter ZH. De Coop hed sämtlichi Schwiizer und Liechtesteiner Läde übernoh. Er wird aber als unabhängigs Unternähme wiitergfüert und d Mitarbeiter hend ihri Stelle chönne bhalte. Luut Coop passed d Produkt vo The Body Shop guet is Sortimänt und es wird wiiterhin uf sini Grundwärt gluegt.

Büecher

• "Body and Soul: Erfolgsrezept Öko-Ethik", Anita Roddick,(Dt. von Joachim Pente und Rainer Schmidt), 1991, 3-430-17791-X
• "Die Body Shop Story: die Vision einer aussergewöhnlichen Unternehmerin", Anita Roddick, (Dt. von Nikolaus Gatter), 2001, 3-430-17878-9

Quelle

• http://www.thebodyshop.de/index.aspx
• https://web.archive.org/web/20180824215457/http://anitaroddick.com/books.php
• http://www.berlinonline.de/berliner-zeitung/archiv/.bin/dump.fcgi/2007/0912/vermischtes/0045/index.html (Site cha nüme abgrüeft wärde; Suche im Webarchiv)[1] [2] Vorlage:Toter Link/www.berlinonline.de
• http://www.nzz.ch/nachrichten/wirtschaft/aktuell/coop_uebernimmt_schweizer_body-shop-laeden_1.5849559.html
• http://www.coop.ch/pb/site/medien/node/64709393/Lde/index.html
• https://web.archive.org/web/20110318042137/http://www.franchising-network.de/franchising-index-56----firmenstories.htm
• http://www.20min.ch/dyim/5be777/B.M220,0/images/content/2/4/9/24931126/2/1.jpg
• http://www.pinknews.co.uk/images/anitaroddick.jpg
• http://www.pinkmelon.de/wp-content/uploads/2009/10/nutmeg_artikel.jpg

Weblink

 Commons: The Body Shop – Sammlig vo Multimediadateie

• Schwiiz: http://www.thebodyshop.ch
• Dütschland: http://www.thebodyshop.de
• Öschterriich: http://www.thebodyshop.at
• International: http://www.thebodyshop.com