Dragikomödie

As Dragikomödie si Theaterschdück bezeichnet worde, wo d Handlig vo dragischem Charakter, aber dr Usgang glücklig isch. Hützudag dänggt mä ehnder, as si ä dragischi Zsämmehäng mit komische Elimänt und Motiv, aber au komischi mid Tragik vermischd.

Gschicht

Die antike Grieche hai Dragödie und Komödie kennt. In dr klassische Ziit si ihri Theaterereignis än Abfolg von erä Trilogie vo dragischem Charakter gsi, ufglockeret von erä abschliessende Komödie. Dr Römer Plautus (254-184 vor dr Ziitwändi) het, im Gegesatz zu der dramatische Dradition, wo Dragödie und Komödie drennt het, dragischi und komischi Gschehnis im gliiche Schdück vermischt. Währed dr Renaissance het mä drmit Schdück gmeint, wo im Groose und Ganze komisch gsi sin, aber dragischi Elimänt gha het. Dr Italiäner Battista Guarini het d Dragikomödie definiert as Schdück, wo ärnschdi Begäbeheite zeigt und Mitliid wurd errege, wo aber kei dragische Schluss und au luschdigi Elimänt wie Witz und Glächder haig. In dr französische Klassik im 16. und 17. Johrhundert isch d tragi-comédie vom Hardy, Rotrou, em Corneille (El Cid) und andere pflägt, aber schliesslig vo dr klassische französische Dragödie verdrängt worde. Z Ängland het dr John Fletcher d Dragikomödie The Faithful Shepherdess (Die dreuji Schöfere) gschriibe, und dr Shakespeare mänggisch siine Komödie dragischi Elimänt ge, zum Bischbil im Schdurm' und im Wintermärli. D Rolle vom Jud Shylock im Dr Kaufma vo Venedig isch villicht für d Ziitgnosse vom Shakespeare, wo dr Antisemitismus für si vollkomme natürlig gsi isch und wo sich an dr gemeine Behandlig vom Shylock ergötzt hai, weniger dragisch gsi, as es modärns Publikum si wurd gseh.

Z Dütschland hai dr Georg Büchner und dr Christian Dietrich Grabbe die dragisch-komischi Dradition vom Shakespeare wiitergfüehrt. Im realischdischi Drama het dr Henrik Ibsen komischi Elimänt iigfüehrt, für dass d Dragödie no druuriger wurd. Für ä George Bernard Shaw si im Ibsen sini Drame ärnschdhafter und dragischer gsi as ä Dragödie. Dr Anton Tschechow het d Dragikomödie Unggle Wanja und Dr Chirsigarde gschriibe.

Im modärne Theater si vili vo de absurde Schdück dragikomisch, Bischbil si im Samuel Beckett siis Ändschbiil odr im Dürrematt siini Physiker.

Quelle

• dtv-Lexikon, Deutscher Taschenbuch Verlag, München 1970, Band 18, S.284
• Dr Ardikel "tragicomedy" in Encyclopædia Britannica. Ultimate Reference Suite. Chicago: Encyclopædia Britannica, 2008.