Tschugger
| Seriedate | |
|---|---|
| Dütsche Titel: | Tschugger |
| Originaltitel: | Tschugger |
| Produktionsland: | Schwiz |
| Produktionsjohr: | sit 2021 |
| Produzänt: |
Sophie Toth |
| Zahl vo de Folge: | 15 in 3 Staffle |
| Originalsproch: | Wallisertitsch |
| Idee: | David Constantin, Mats Frey |
| Genre: | Krimi-Komöödia |
| Erstusstrahlig: | 28. November 2021 auf SRF und Sky Switzerland |
| Bsetzig | |
| |
| Dialäkt: Wallisertitsch |
Tschugger (stddt. Polizist) isch en Schwizer Krimi-Komedi-Seeria vam David Constantin und dum Mats Frey üsu Jaar 2021 bis 2024. D Seeria isch en Koproduktioo vam Schwizer Fernse SRF mit Shining Film.[1] D eerscht und di zweit Staffla sind zämu mit Sky Switzerland produzierti cho. Äs geit umu Walliser Kantoonspolizischt Bax (David Constantin), wa en Drooguschmuggel will üfdecku. Der David Constantin het Regie gfiert und ds Dreebüech gschribu.
Handlig
ändereD eerscht Staffla
ändere
Iner eerscht und zweit Staffla geits vor allum um en Regionaalposchtu vaner Walliser Kantoonspolizii. Der Bax, wa eiguntli Johannes Schmidthalter heisst und am Afang va schiiner Polizischtukarrieera du Bernard Rappaz verhaftut het, ermittlut uf eiguni Füüscht ima Fall va illegaalum Handel mit Cannabis. Ufum Poliziiposchtu, wa der Bax schaffut, macht der «Smetterling» (eiguntli Patrick) va Zürich grad es Praktikum und denu tüet er uberredu, imu bi schiiner verdeckt Ermittlig z hälfu. Der Smetterling soll undercover mitera Droona Cannabis uber d Schwizer Gränza schmugglu. Wa der Smetterling mit der Droona ufum Simplopass probiert der Undercover-Üftraag üszfieru, bigägnunt mu zwei italienischi Kurierfaarera, wa ufera ganz annru verbrächerischu Missioo sind. Der Smetterling erschiesst schi beidi in Nootweer, aber är wird derbii sälber öi schwäär verletzt.
En witeri Höiptpersoo isch di Bundespolizischti Annette Brotz. Schi chunt ufum Poliziiposchtu vorgstellt, aber niemu weiss eso genau, warum di Bundespolizii schi het in ds Wallis gschickt. Der Züeschauer erfaart aber de, dasch wägu ra üsggaartutu Bitribsfiir vam Poliziiposchtu, wasch im Pfiiwaald hent gcha, isch ufu Poschtu cho.
Iner vorletscht Folg erfaart mu, dass epper, wa ufum Poliziiposchtu schaffut, mim Verbrächer zämuschaffut, wa di zwei Tootu ufum Simplopass het la verschwinnu und jetz irusch Transporter und en bstimmte Schlussil will gfinnu. Denu Schlussil gfinnt de iner letscht Folg der Juni, aber fer was, dass der daa isch, erfaart mu nu nit. D Fröi Brotz packt grad irusch Ggoffra, wasch pletzli ds Gfül berchunnt, dass irusch Üftraag im Wallis nu nit biändute isch. Gliichzitig wissunt der Bax und der Pirmin, schiine bescht Kolleeg, nu nit, wie schlimm, dass sus umu Smetterling, wa immer nu im Spitaal isch, steit. Am Schluss vaner eerscht Staffla gcheert mu en Schuss im Spitaal und der Pirmin merkt schüst in dem Momänt, dasser schini Waffa nimme uf schich het.
Di zweit Staffla
ändereDer Bax und der Pirmin verfolgunt du Verbrächer, wa du Smetterling het wellu teetu. Wil der Verbrächer aber du Schlussil nit het chännu bsoorgu, tüet nu schliessli en Gruppa va Vermummtu teetu. Di Polizii chunnt churz dernaa anu Taatoort, aber en Mülwurf iner Polizii verhinnrut, dasch erfaart, was der Bax und der Pirmin mit eigune Öigu gsee hent. Allerdings het das öi es bitsji daadermit z tüe, dass der Pirmin üs Verseehu unner Drooge isch gstannu und der Bax suschpendierte cho isch und mu imu darum nit wirkli het züeglosu, waser z sägu het. Der Juni bringt du Schlussil iner Zwischuzit zer Polizii, wiler het üsagfunnu, das der Schlussil offubaar chännti gfeerli sii. Aber öi du Juni nämuntsch nit ääresch und lachunt nu nummu üs.
Wa de di Polizii probiert du Bax z verhaftu, holder du Smetterling üsum Spitaal und schi töichunt zämu unner. Zer gliichu Zit wird d Valmira empfiert, fer dass d Verbrächer anu Schlussil chämunt. Der Juni brächut wägu deschi de in d Asservaatuchammra vaner Polizii i, fer du Schlussil wider zruggzholu. Wäärund deschi tient schi der Bax und der Smetterling d Informazioone vaner Poliziistazioo uf elektroonischum Wäg bsoorgu, was aber derzüe fiert, dassch dum Juni du Wäg üsum Poliziigiböide wägu du starchu elektroonischu Signaali verbuwwunt.
Der Pirmin isch wägu schiinum unfriiwilligu Droogumissbrüüch äbufalls suschpendierte cho und will eiguntli nix me mit du Ermittlige vam Bax z tüe ha. Aber d Fröi Brotz cha du Pirmin de uberredu, mit ira numal anu Oort z cho, wa der Bax und der Pirmin d Vermummtu gsee hent. Schii gfinnunt üsa, dassus bi dem Schlussil offubaar um en Katastroofa va «biblischu Üsmaassi» geit. Der Poliziimülwurf cha fer du Momänt nu unerkannt bliibu, wiler ds Poliziifunk ablost und esoo du Schlussil nu cha bhaaltu.
Der Juni rettut zämu mit dum Pirmin, der Valmira, der Fröi Brotz, dum Bax und dum Smetterling en Millioo Mänschu. D Schwizer Regierig will aber di Katastroofa, wasch hent chännu verhinnru, nit öffuntli machu, und esoo erfaart de öi niemu, was der Bax fer en Heldutaat het vollbrungu.
Di dritt Staffla
ändereAm Afang vaner drittu Staffla gseet mu, wie der Bax z Bääru wont und daa en annre Mänsch will wäärdu. Är het als «Eco-Hipster»[2] z eersch Maal «z schich sälber gfunnu». Öi der Pirmin het mittlerwiilu di Polizii verlaa und will mit schiiner Fröi Regina und schiinum Botsch, dum Benjamin, eifach in Rüe im Wallis läbu. Aber genau in dem Momänt, litut z Telefo vaner Regina und der Notaar Von Roten (gspilt vam Hansrüedi) isch dra. Churz drufab finnut d Regina und der Pirmin du Notaar erheichte. Der Pirmin ermittlut uf eiguni Füüscht und vermüetut, dass der Notaar dur ds Feischter miessegi ermoordute cho sii. Är geit zum Dr. Schmidthalter, wa der Liichnaam vam Notaar Von Roten fer d Obuktioo liggut, und erfaart einersits, dass der Dr. Schmidthaalter meint, äs chännti schi um en Vergiftig handlu und annerersits berchunt er öi nu du Schlussil, wa mu im Liichnaam gfunnu het.
Nur es bitsji spääter gseet mu de öi nu, wie d Fröi Brotz vama Giftpfil gitroffni und eso ermoorduti chunt. Schii ischus gsi, wa churz vorum Toot vam Notaar Von Roten telefoonisch het gibättu, dass mu mu d Akta Biffiger soll schicku. Wil mu du Bax naam Toot vaner Fröi Brotz glaffne iner Wonig irusch Wonig finnut, gäältut är sofort als taatverdächtig und chunt in Poliziigwaarsaam. Va daa chan er de allerdings scho baald wider flüchtu. Dernaa finnunt der Pirmin, der Bax und der Juni zämu du Smetterling, wa im Pfiiwald isch unnergitöicht und jetz da wont; der italienisch Clan süecht nu nämli immer nu. Z viert probieruntsch dum Räätsel umu Schlussil uf d Spuur z cho und finnunt üsa, dass er ehemaalig Chef vaner Walliser Poliziistazioo fer du Bundesnaachrichtudienscht het gschaffut und dass der Schlussil chännti zuma Schliessfach passu, wa da ima Tresorrüüm isch. Dernaa brächunt der Bax und der Pirmin inu Tresorrüüm vam Bundesnaachrichtudienscht i, aber in dem Momänt, wasch lüegunt, was im Schliessfach dri isch, chämunt grad zwei Poliziimülwirf, wa d Akta vernichtunt und probierunt du Bax und du Pirmin z teetu, aber der Pirmin cha schi in Nootwerr erschiessu. Der Oberstaatsawaalt Schnydrig verbrennt öi nu en Akta und am Schluss chännunt der Bax und der Pirmin zwaar üser verbranntu Akta erfaaru, dass der Biffiger emaal 20 Millioone Franku in Gold het bercho, aber nit warum.
Ganz am Schluss gseet mu inera Vorbländi, wie der Bax und der Pirmin inera Bifräägig unner Eid bim Senat vanu Vereinigtu Staatu vanera «nuklearu Bidrooig» redunt.
Folge
ändere| Nr. | Nr. | Orginaaltitel | Eerschtüstraalig | Schnitt |
|---|---|---|---|---|
| 1 | 1 | Smetterling | 28. November 2021 | Alessandro Biffi |
| 2 | 2 | Tomatsossu | 28. November 2021 | Benjamin Fueter |
| 3 | 3 | Rossgagla | 28. November 2021 | Sophie Blöchlinger |
| 4 | 4 | Forällu | 28. November 2021 | Sophie Blöchlinger,
Kirstin Reppas |
| 5 | 5 | Nahtag | 28. November 2021 | Alessandro Biffi |
| Nr. | Nr. | Orginaaltitel | Eerschtüstraalig | Schnitt |
|---|---|---|---|---|
| 6 | 1 | Drogä | 15. September 2022 | Alessandro Biffi |
| 7 | 2 | La Bomba | 15. September 2022 | Sophie Blöchlinger |
| 8 | 3 | Schwimmflügeli | 15. September 2022 | Sophie Blöchlinger |
| 9 | 4 | Mülwurf | 15. September 2022 | Alessandro Biffi |
| 10 | 5 | Pentagon | 15. September 2022 | Alessandro Biffi |
| Nr. | Nr. | Orginaaltitel | Eerschtüstraalig | Schnitt |
|---|---|---|---|---|
| 11 | 1 | Tabula Rasa | 19. November 2023 | Claudio Cea |
| 12 | 2 | Toxisch | 19. November 2023 | Lars Wicki |
| 13 | 3 | Bill Geits | 19. November 2023 | Alessandro Biffi |
| 14 | 4 | Prepperling | 19. November 2023 | Riccarda Schwarz |
| 15 | 5 | Papatag | 19. November 2023 | Dennis Gnoni Visconti |
Füessnoote
ändere- ↑ Hausbesuch bei den Masterminds der Schweizer Erfolgsserie, Tages-Anzeiger, 12. September 2022.
- ↑ Pascal Blum: «Tschugger» ist wieder da – mit Sprüchen über Loredana, Tages-Anzeiger, 17. November 2023, S. 31. Online-Versioo unner: https://www.tagesanzeiger.ch/krimiserie-tschugger-wallis-ist-zurueck-mit-witzen-ueber-loredana-255400871491 (z letsch aglüegt am 18. März 2024).
Weblinks
ändere- Tschugger ufum Meediuportaal vam SRF
- Tschugger in dr Internet Movie Database
- persoenlich.com: «Tschugger» erreicht über 30 Prozent Marktanteil