Ungarische Forint

Forint
Land/Länder	Ungarn Ungarn
Underdeilig	keini bis 1999 hundert Fillér
Abchürzig	Ft.
Abchürzig (ISO-4217)	HUF
Wechselkurs (7. Oktober 2019)	1 EUR = 333,64 HUF 100 HUF = 0,3 EUR 1 CHF = 305,42 HUF 100 HUF = 0,327 CHF
Im Umlauf	1946 bis 2020^(?)
Chleinsti Münze	5 Forint
Gröschte Schyn	20'000 Forint

De Ungarisch Forint (ung. magyar forint [ˈmɒɟɒr ˈforint], Abchürzig: HUF) isch d'Währig vo Ungarn.

Gschicht

Im mittelalterlige Königrych Ungarn und in de östrych-ungarische Monarchy isch de Forint scho e bekannti Währig gsi. Er isch au in andere Länder benutzt worre.

Noch em Zweite Wältchrieg, am 1. August 1946, isch als Folg vo de Hyperinflation de hüttig Forint anstell vom Pengő ygfiehrt worre: de Forint isch nümmi uss Gold gsi. Er isch sällemols no in hundert Fillér underdeilt worre, sälle isch aber sit 1999 nümmi im Umlauf.

Au noch em Ydritt vo Ungarn in di Europäischi Union isch de Forint blybe, er isch aber nümmi lang im Umlauf. Wänn de Euro ygfiehrt wird, isch im Momänt no nit chlärt. Noch de letschte Agabe wird er no bis 2012 s Zahligsmittel vo Ungarn sy.

D Umsetzig vom Forint i Euro isch du doch nid so schnäll gange wi alli gmeint het. Zersch het di Ungarisch Regierig gseit, si well 2008 der Forint abschaffe. Chly später het's du heisse me miech das 2010. Doch beidi Termine hei wäge höche Staatsdefizit nid chönne yghalte wärde. Sit em Jahr 2006 git's kes offiziells Datum meh wenn das das söll passiere. Im Februar 2011 het der Minischterpresidänt Viktor Orbàn im ne Interview gseit, das d Ungaren nid vor 2020 der Euro überchömme. Öp das allerdings klappet hanget aber Houptsächlech dervo ab, öp Ungarn der Wächselkursmechanismus II erfülle odern nid. Wenn das nid der Fall isch blybt er Forint no lenger.

Am 1. März 2008 sin d'1- und 2-Fillér-Münze abgschafft worre; ihri Herstellig hät d'Notebank mehreri Milliarde Forint chostet. D'Brys, wo nit mit me Nuller oder me Fümfer uffhöre, mien uff- (2,49 und weniger) bzw. abgrundet (2,5 und meh) werre. Vyli Kasse und Kassebrogramm hän sich no nit do dra abasst, sällewäg mien d'Brys oft no im Chopf usgrächnet werre. Bi Kontoständ wird jewyls di ganzi Summe uff- oder abgrundet.

Münze

Di erschte ungarische Münze sin im Johr 1946 brägt worre; es hät si im Wert vo 2, 10 und 20 Fillér und 1, 2 und 5 Forint gee. Sälli Münze sin bis 1989 hergstellt worre und in säller Zit numme um Chleinigkeite verändert worre, usserdem hät mer d'50-Fillér-, 1- und 2-Forint-Münze agschafft. 1989 sin völlig neui Münze im Wert vo 1 bis 200 Forint usegee worre; de Fillér isch bis zum Johr 1999 stufewis abgschafft worre. 1998 hät mer s 200-Forint-Stuck us em Verchehr zoge, am 15. Juuni 2009 isch e neus iigfiehrt wore.

Di erschti zweifarbigi Münze, s 100-Forint-Stuck, wo hütt no im Umlauf isch, isch im Johr 1996 usegee worre. Sit 2002 werre jedes Johr neui Münze in de Verchehr brocht. Für Sammler werre au Münze uss Buntmetall, Silber und Gold hergstellt.

Schyn

D'Rucksite vo me Zähdausender

D'Schyn sin vom Grafiker Károly Vagyóczky gstaltet worre. Si werre in de Diósgyőri Papírgyár ("Babierfabrik Diósgyőr") druckt und alli glych groß (154x70 mm). Uff allne Gäldschyn findet mer

uff de Vordersite de Wert, de Stempel vo de Magyar Nemzeti Bank (Ungarischi Nationalbank), s Wappe vo Ungarn
uff de Rucksite de Wert und verschydeni Abbildige

Hütt sin Schiin zu 500, 1000, 2000, 5000, 10000 un 20000 Forint im Umlauf. Bis zum 15. Novämber 2009 sin au Zweihunderter im Umlauf gsi, sì sin abber scho vier Monet vorhär durch di gliichwärtigi Münze ersetzt wore.

Extärni Site

Commons: Gäld vo Ungarn – Sammlig vo Multimediadateie

Dä Artikel basiert uff ere fräie Übersetzig vum Artikel „Magyar_forint“ vu de ungarische Wikipedia. E Liste vu de Autore un Versione isch do z finde.