Ushanas

De Ushanas oder Kavya Ushanas (Sanskrit: उशनस्, Uśanas m.) oder Shukra (Sanskrit: Śukra m. „Glänzige“) isch im Hinduismus e göttliche Waise (Rishi) und de Gott vom Planeet Venus. Er isch de Soo vom Waise Bhrigu und vo de Puloma.

de Shukra as Planet Venus

Mythos

Im Rigveda hett de Kavya Ushanas em Donnergott Indra im Champf gege de Dämoon Shushna gholffe, indem er em de Donnerkail Vajra bsorgt hett und en mitem Ruuschtrank Soma Muet iigflööst hett.

Im indische Nationaalepos Mahabharata werd verzellt, wie de Ushanas herti Askeese güebt hett und ase zo öbernatüürlichi Chräft choo isch. Er hett denn em Kubera sii Wille ewegg gnoo und all dem sini Schätz. De Shiva, wo vom Kubera um Helf bette woren isch, hett den de Ushanas verschluckt, well er nöd i de Laag gsii isch, en z tööte. De Ushanas isch drufabe im Liib vom Shiva umegwanderet und hett debi Hymne uf de Shiva gsunge. Noch file Joore isches em gglunge us de Öffnig vom Penis is Fraiji z choo. Wege demm werd er Shukra gnennt, wa im Sanskrit „glänzig, wiiss“ aber oo „Sperma“ bidüttet. De Shiva hetten doo zwoor wöle tööde, aber d Uma, sini Frau, het emm da verbotte und gmaint, as er, wel er us siim Penis choo sai, folglich sii Soome und dodemit siin Soo weer.

Kauui Usan

Im iraanische Avesta werd zwaimool de Kauui Usan (altpers.: Kay Ūs) gnennt, wo im Shahnameh vom Firdausi as mythische König Kay Kāvūs witterlebt. Wie de indisch Kavya Ushanas isch de avestisch Kauui Usan im Bsitz fo maagische Chräft (Yasht 14,39) und hett dromm d Herrschaft öber ali Mentsche und Dämoone gwune (Yasht 5,45ff). Baidi Gstaalte gönd ufe gmainsaame indoarische Vorgänger zrugg und chöntet sogäär indogermanischi Worzle haa. Gmainsaamkaite wo di indischi, di avestischi und di spööteri persischi Gstaalt hend, sind die:

• de Bsitz vo öbernatüürliche Chräft, under anderem e Mittel gege s Aalter und de Tood
• groosse Riichtuum
• Priesterschaft oder d Herrschaft öber d Dämoone
• Ritt oder Faart in Himmel, und em Sturz denoo

Literatuur

• Hans Wilhelm Haussig, Heinz Bechert (Hrsg.): Götter und Mythen des indischen Subkontinents (= Wörterbuch der Mythologie. Abteilung 1: Die alten Kulturvölker. Band 5). Klett-Cotta, Stuttgart 1984, ISBN 3-12-909850-X.
• Sukra. In: John Dowson: A classical dictionary of Hindu mythology and religion, geography, history, and literature. Trübner & co., London 1879, S. 307.