Victor Erne
De Victor Erne (* 24. April 1939; † 21. Oktober 2014 z Bade) isch vo 1990 bis 1996 Mitglid vo de Generaldirektion vo de Schwiizerische Kreditaastalt gsi.
Läbe
ändereUfgwachse isch de Victor Erne z Melike und im Stohlerguet z Bade. Nach de Schuel het er s Lehrerseminar z Wettige bsuecht und isch dann zerscht im Freiamt Lehrer gsi. Danach het er an de Uni Züri Gschicht, Germanistik un Philosophii gstudiirt, het promoviirt und isch dann e paar Johr wider im Seminar gsi, wo er Gschicht unterrichtet het. Im 1969 isch er dann zu de SKA cho, wo er in de Personalinformation aafange schaffe het. In de Hiirarchii vo de Bank isch er dann Stück für Stück vorwärts cho. In de ganze Ziit bi de SKA isch er in vilem en Pioniir gsi. So het er d Mitarbeiterzitschrift «bulletin» gründt, wo konzernwiit in viir Sprooche erschinen isch, er het en professionelle Werbe- und Marketingservice ufbauet und dafür gsorged, dass sini Bank sich im Sponsoring dued engagiire. So isch d SKA sowohl zu eme Sponsor vo Sportveraastaltige wie d Tour de Suisse und de NLA worde, wi au zu eme Sponsor für Kulturhüüser und Musikfestivals.
Im 1990 isch er Mitgliid vo de Generaldirektion worde und isch derte für di ganz Logischtik vom Konzern zuständig gsi. Wo d SKA im 1997 in de CS Holding ufgangen isch, isch er us em Generaldirektorium usgstiige und isch de CS witerhin als Berater zur Verfüegig gschtande.
Näbe sinere Arbet isch de Victor Erne au privat sehr engagiirt gsi. Unter anderem isch er Iiwohnerrot z Bade gsi, Präsident vo de Finanzkommission z Gäbischtorf und het sich für de Erwiterigsbau vom Aargauer Kunschthuus iigsetzt.
Weblink
ändere- «Ein Mensch, der andere gern hatte»: Letzte Ehre für Viktor «Vige» Erne, AZ-online am 31. Oktober 2014
Quelle
ändere- AZ vom 30. Oktober 2014: Zum Tod von Victor Erne, alt Generaldirektor SKA, von Hans Fahrländer