Institut für Schnee- und Lawineforschig

S WSL-Institut für Schnee- und Lawineforschig (SLF) isch es interdisziplinäärs Forschigszäntrum z Davos im Kanton Graubünde.

s Institut z Davos Dorf
s Forschgisgebäud uf em Wyssfluejoch
s WSL-Institut für Schnee- und Lawineforschig SLF

Ane 1931 het dr Bund en Kommission für d Forschig übere Schnee und d Lawine ggründet. Sid 1935 het die z Davos Versüech mit em Schnee gmacht. Ane 1936 het me uf em Wyssfluejoch weschtlech vo Davos es Huus für Experimänt i dr Chelti bout. Und dört obe isch denn 1942 s Eidgnössische Institut für Schnee- und Lawineforschig – Davos-Wyssfluejoch ygrichtet worde.

D Forscher hend probiert usefzinde, wie sech d Schichte vom Schnee entwickle, wie sech dr Schnee am Bärghang cha bewege und wie s zu Lawine chunt. Im Mikroberych luegt me, wie sech d Kristallstruktur vo de Schneeflocke mit dr Zyt veränderet und wie sech drby d Stabilität vom Schnee verhaltet.

En wichtigi öfentlechi Uufgab het s Eidgnössische Institut für Schnee- und Lawineforschig ane 1945 übercho, wo me vo Davos uus d Bevölkerig vo dr Schwiiz jewyle het müesse drüber informiere, wenn i de Bärge gfärlechi Lawineverheltnis entstande sind.

Im Winter 1951–1952 sind wäge bsunders grosse Schneefäll so vil Lawine im Alperuum abggange wie no sälte, und es isch bi vilne Dörfer i de Alpelände zu schwäre Schäde cho. Jetz het d Schwiiz es baar Bundesbehörde, wo für d Forschig i dr Natur zueständig sind, besser koordiniert; d Ämpter für d Meteorology und für d Waldforschig hend mit em Schnneeforschigsinstitut z Davos noch afo zämeschaffe. 1989 isch s Davoser Forschigszäntrum ganz mit dr Waldforschig verbunde worde; es ghört jetz als e Deil vo dr Eidgnössische Forschigsastalt für Wald, Schnee und Landschaft WSL zu dr ETH-Gruppe.

Dr Hauptsitz vom SLF isch z Davos Dorf, s Forschigslabor uf em Wyssfluejoch isch e Zwiigstell.

Hüt tuet s SLF i dene Berych forsche:

  • Schnee
  • Lawine
  • Luft
  • Naturgfoore (Schnee, Bärgbech, Bärgstürz)
  • Permafroscht
  • Ökosyschteem vo de Alpe

S Institut hilft mit, dr Lawineschutz z verbessere, Lawineunfäll z undersueche, usezfinde, was dr Schneesport i dr Umwält tuet arichte, und neui Alarmtechnike für Naturgfoore i de Bärge z entwickle. Es git im Winter zwöimol jede Tag es Lawinebulletin für d Schwiiz use.

Usert z Davos het s SLF no anderi Standort für d Forschig zu bsundere Theme z Birmensdorf, z Bellinzona, z Sitte und z Lausanne.

Weblink ändere