Wikipedia:Treffen der Wikipedianer/Jubiläumstreffen 2023
Di voranig Diskussioon findsch uf em Stammtisch.
Termyn: Sunndig, 19. Novämber 2023
Oort: Zeppelinmuseeum z Fridrichshafe
Churzbricht
ändere
Di Alemanisch Wikipedia isch hüür zwänzgi woorde! Für das Jubilèèumsträffe hämmer s Zeppelinmuseeum am tüütsche Bodesee-Uufer bsuecht. Deby gsy sind der al-Qamar, de B.A.Enz, de Freiguet, de Gestumblindi, de Pakeha, de Terfili und vo de Wikimedia Schwyz de Maurus Achermann; de Holder hät läider müese ganz churzfrischtig absäge.
Föif Lüüt händ si scho z Züri am Perron troffe und im Zuug uf Romishorn zäme gkäfelet. Uf de Fèèri über s Schwööbisch Meer simmer scho z sächsten am Trinke und sogaar Ässe gsy, und im Zeppelinmuseeum isch na de Sibet dezuegstoosse. S Museeum isch chäibe guet gmachet und würkli intressant; de Schryber hät vil chöne leere (und hät au gstuunet, was für en tächnischen und pèrsonelen Uufwand hät müese tribe wèèrde, zum hööchschtens 72 Passaschier chöne vo Europa uf Nord- oder Süüdamèrika bringe …). De Wikimedia Schwyz säged mer übrigens tanke für d Yladig i s Museeum. Nachane hämmer imene Reschterang am See Zmittaag ggässe – und deby di alemanisch und di hoochtüütsch Wikipedia und dèren iri Schryber, Schryberinen und Schryberling vo z vorderscht bis z hinderscht und wider zrugg dureghächlet. Me händ au ghöört, das sibe vo zää Junge z Obwalde di tipische Tialäktmèrkmaal vom Obwaldnertytsch abgläit händ, und de Schryber hät wider emaal gstuunet, das Luzèèrner e starch offes reschp. gsänkts ìì (wie i luzèèrntüütsch ììch) nöd chönd vomene gschlossenen éé (wie i luzèèrntüütsch See) underschäide, d Nöd-Luzèèrner aber scho. Me händ fascht nüme chönen uufhöre – zum Glück häts für föif vo öis wider e langi Zuugfaart uf Züri zrugg ggèè, wo mer na händ chönen ales säge, was mer defüür vorane na ekäi Zyt ghaa händ … Es isch en würkli glungene Gmäinschaftsaalaass gsy! --Freiguet (Diskussion) 22:47, 19. Nov. 2023 (MEZ)