S Woonhuus Schaeffer-von Déchend

Koordinate: 47° 34′ 46,7″ N, 7° 39′ 18,9″ O; CH1903: 616299 / 269906

Dialäkt: Baseldütsch
S Huus Schaeffer-vo Déchend

S Woonhuus Schaeffer-von Déchend isch en Äifamiliehuus im Stiil vom Nöije Baue am Sandrüterwääg 44 z Rieche.

S Huus stoot uf dr Liste vo de Kulturgüeter z Baasel, wo nazionali Bedütig häi.

Gschicht ändere

1927/28 häi d Archidekte Paul Artaria und Hans Schmidt für s Musikerehebaar Edmund und Muriel Schaeffer-von Dechend en Äifamiliehuus im Sinn vom Modärne Baue baut. S Huus bestoot us eme churze Woondrakt im Bardeer in dr Richdig vo dr Diefi vo dr Parzälle und eme lenglige Schloofdrakt im erste Stock, wo uf Stütze stoot kweer zum Bardeer isch. Die Flachdachkörper si uf eme Staalskelett ufbaut, bestöön us Bimsblatte und häi e Schicht vo Bachstäi für d Isolierig. D Schiebfänster mit Metallraame si speziell für s Huus entwigglet worde, si bündig mit dr Fassade iibaut und understriiche eso dr skulptural Effekt vo dr kubistische Gsamtkomposizioon.

Mit em Entwurf häi sich die bäide Archidekte mit em Brojekt vom Le Corbusier usenandergsetzt, wo zu sällere Zit e Dobbelhuus in dr Mustersiidlig Stuttgart-Wissehof baut het. Verschidnigi archidektonischi Motiv und d Elementarfarbe für d Fänster und Düüre bezien sich diräkt uf e Le Corbusier und uf die holländischi Künstlergrubbe "De Stijl". Wie dr Schloofzimmerdrakt aagordnet isch, isch e diräkts Zitat vom "Schloofwaage-Huus" z Stuttgart vom Le Corbusier. S Huus Schaeffer isch aber exemplarisch sträng in dr Art, wie d Postulat vo dr Modärne konsekwänt umgsetzt worde si, me no as bi sine zitgenössische Vorbilder.

D Archidekte Paul Artaria (1892 – 1959) und Hans Schmidt (1893 – 1972) wo vo 1923 bis 1930 zämmegschafft häi, si die erste Archidekte z Baasel gsi, wo d Ideä vo dr modärne Avantgarde konsekwänt übernoo und in meerere Äinzelbaute und Siidlige umgsetzt häi. Iiri Wärk zele hüte noch em Architektenlexikon der Schweiz (Basel 1998) "zu de wichdigste Demonstrazione vom Nöije Baue in dr Schwiz" und s Huus Schaeffer z Rieche isch worschinlig s beste Bischbil drfür. D Ideä, wie mä die verschiidene Funkzioone vom ene Geböid entflächdet, wie mä mit sowenig Ruum und Material wie mööglig uschunnt und wie mä d Konstrukzion tüpisiert, gseet mä do wie im ene Leerbuech.

S Huus isch denn e baar Mol, nid zu sine Gunste, abgänderet und zimlig vernoochlässigt worde, aber 1990 häi es sini Äigedümer vorbildlig restauriert.

Kwelle ändere

«Das Haus Sandreuterweg 44 unter Denkmalschutz»

Weblingg ändere