Wyynedaal- und Suuredaalbaan

D Wyynedaal- und Suuredaalbaan (WSB) isch e privati Ysebaangsellschaft im Aargau. Si betribt vo Aarau us Baanlinie is Wyynedaal bis Mänzike und is Suhredaal bis Schöftle.

Gschicht und LinienetzBearbeite

Di elektrischi Aarau-Schöftle-Baan (AS) het ane 1901 dr Betriib ufgnoo und drufabe au d Wyynedaalbaan (WTB) vo Aarau uf Rinech ane 1904. Im 1958i hend sech die beide Baangsellschafte zu einere zämegschlosse. Sider heisst d Firma Wyynedaal- und Suuredaal-Baan (WSB). Sid em Joor 2002 ghört d Baangselschaft zäme mid dr Gsellschaft Busbetriib Aarau zu dr Tachgsellschaft AAR bus+bahn.

D WSB het zwei Baanstreckene, wo früener von enand trennt vo beid Syte zum SBB-Baanhof vo Aarau cho sind und wo sech jetz aber im eigete WSB-Baanhof träffe. S ganze Strekenetz isch 32,2 Kilometer lang. Es goot dur 17 Aargauer Gmeinde. D Wyynedaallinie goot vo Aarau us uf Buchs, Suhr und Gräniche, denn under dr Burg Liebegg dure und uf Töüffetu, Underchulm, Oberchulm, Gonteschwiil, Zetzbu, Leimbach und uf Riinech und Mänzike. D Linie durs Suuredaal goot vo Aarau au us i die anderi Richdig, zerscht dur es Dunäll und den uf Underämpfälde, Oberämpfälde, Mue und bis uf Schöftle. Bim Baanhof vo Schöftle isch s Depot für d Züüg und au d Wärchstatt vo dr WSB.

Früener sind beidi Linie uf dr Strooss verloffe, si sind aso klassischi Überlandtram gsy, wie mer um 1900 ume vili boue het. Zwüsche 1967 und 2010 hät me d Baan und d Strooss trennt. Z meischt verlauft d Baan hüt eifach näbe dr Strooss uf emen eigete Trasse, zum Teil aber het me si au völlig nöi verleit: Z Gräniche und z Mue isch es e ganz e nöii Strecki, und z Buchs, z Riinech und z Mänzike bruucht d WSB hütt früenerigi SBB-Baanstreckene. Hüt hets numen no z Töüffetu es Stuck, wo d Baanglöis im Alfalt ligge.

Bis 1977 het d WSB no Baanposchtvercheer und bis 2012 au no Güetervercheer gha.

Dr Kanton Aargau als Hauptakzionäär wott, ass d WSB mid de Brämgarte-Dietike-Baan zämegoot.[1]

BilderBearbeite

LiteraturBearbeite

  • Jakob Heer: WSB: Wynental- und Suhrentalbahn. Aarau 1984.

WeblinkBearbeite

  Commons: Wynental- und Suhrentalbahn – Sammlig vo Multimediadateie

FuessnooteBearbeite

  1. Urs Helbling: Der Zusammenschluss der beiden Aargauer Regionalbahnen ist heikel (Memento vom 17. Juni 2017 im Internet Archive) uf aargauerzeitung.ch vom 8. November 2016