Acis and Galatea

Acis and Galatea (HWV 49) isch e Masque vom Georg Friedrich Händel. Mänggisch bezäichnet me s au as Oratorium.

Wie s entstande isch

Dr Händel het 1708 die italiänischsproochigi „Serenata“ Aci, Galatea e Polifemo gschriibe. Acis and Galatea uf Änglisch isch woorschinlig im Früelig 1718 entstande für e Landsitz vom Earl of Carnarvon (vo 1719 aa Duke of Chandos) und het musikalisch mit dr früenere Komposizioon nüt gmäinsam. Die ersti Fassig isch nit in Akt iidäilt. As Figuren si din näben em Acis, dr Galatea und em Polyphem au dr Schoofhirt Damon. Mit eme zuesätzlige Tenor häi die Solosänger au dr Choor bildet.

Acis isch wie im Händel si Esther in de 1730er Joor wider ufgfüert worde und zwar am 17. Mai 1732 vom Thomas Arne (Vater vom Komponist Thomas Augustine Arne) und em John Frederick Lampe und Henry Carey im Londoner Little Theatre. D Sänger si d Susanna Arne (spööter Cibber) und dr Gustavus Waltz gsi, wo bäidi spööter zum Händel sinere Opere- bzw. Oratoriedrubbe ghöört häi.

Dr Händel het as Antwort druf e Hufe Arie us sinere Serenata Aci, Galatea e Polifemo drzue, het sich aber nid vil Müe gee, alles aazbasse. Die Versioon isch in drei Akt iidäilt gsi und het acht Rolle ghaa und dr Händel het sä mit sinere äigene Drubbe ufgfüert. Die italiänische Sänger häi drbii uf Italiänisch gsunge und die änglische uf Änglisch. Am 10. Juni 1732 isch s Stück am Haymarket zum erste Mol ufgfüert worde und mä het s siibemol widerhoolt.

Noch 1739 het dr Händel wider mee oder weniger d Fassig vo 1718 vorzooge. Er het s Wärk in zwei Akt iidäilt, s Duett Happy we chürzer gmacht und denn isch e Choor mit em gliiche Ditel cho, wo dr erst Akt abgschlosse het.

Die spooti Fassig isch 1743 druckt worde und isch s äinzige groosse Wärk vom Händel, wo zu sine Läbziten as vollständigi Partitur veröffentligt worde isch. D Uffüerige hützudaag orientiere sich mäistens an dere Versioon.

Im Mozart si Bearbäitig

Acis and Galatea isch s erste Wärk vom Händel, wo dr Wolfgang Amadeus Mozart im Ufdraag vom Gottfried van Swieten bearbäitet het. Er het je zwäi Klarinette, Fagott und Hörner drzuedoo und d Blockflööte mit Querflööte ersetzt. Das nöiinstrumentierte Acis und Galatea, wo Dütsch gsunge worde isch (KV 566) het dr Mozart im Novämber 1788 gmacht, spööter het er no dr Messiah, Alexander’s Feast und d Ode for St. Cecilia’s Day bearbäitet.

S Libretto

S Libretto isch vom John Gay. Dr Stoff chunnt us dr griechische Müthologii und mä findet en zum Bischbil in de Metamorphose vom Ovid.

Weblingg

• Partitur vo Acis and Galatea (Händel-Wärkusgoob, uusegee vom Friedrich Chrysander, Leipzig 1858)

Litratuur

• Winton Dean: Handel's Dramatic Oratorios and Masques. Clarendon, Oxford 1989, ISBN 0-19-816184-0, (Originalausgabe: Oxford University Press, Oxford 1959), (englisch).
• Hans Joachim Marx: Händels Oratorien, Oden und Serenaten. Ein Kompendium. Vandenhoeck & Ruprecht, Göttingen 1998, ISBN 3-525-27815-2.
• Albert Scheibler, Julia Evdokimova: Georg Friedrich Händel. Oratorien-Führer. Edition Köln, Lohmar 1993, ISBN 3-928010-04-2.

Dä Artikel basiert uff ere fräie Übersetzig vum Artikel „Acis_and_Galatea“ vu de dütsche Wikipedia. E Liste vu de Autore un Versione isch do z finde.