Acta Murensia

D Acta Murensia (äigentlech: Acta fundationis monasterii Murensis) sind en Chronik über d Gründig und d Afangszyt vom Chloschter Muri im Kanton Aargau.

Acta Murensia

Das Buech isch vom ene Mönch im Chloschter Muri i dr Middi vom 12. Joorhundert uf Latynisch gschribe worde. Dr Schryber het für sin Bricht elteri gschichtlechi Kwelle vom Chloschter bruucht. Hüt isch nur no en Abschrift us em Spootmiddelalter erhalte.

Nid nur für d Gschicht vom Chloschter Muri, sondern für die vom Aargau sind i de Acta Murensia wichtegi Informazione z finde, und si gälte bsunders au für di erschte Gschicht vo dr Familie vo de Habsburger, de Gründer vom Chloschter Muri, als die beschti Kwelle.

D Chronik foot mit ere Lischte vo de Grafe vo Habsburg a, brichtet über d Chloschtergschicht und bringt es Güeterverzeichnis, wo der Psitz vo Muri i dr Schwiiz und im Elsass ufzellt. Vil Ortschafte im alemannische Ruum sind do drin s erschte Mol erwäänt.

Literatur

• Charlotte Bretscher, Christian Sieber: Acta Murensia. Die Akten des Klosters Muri mit der Genealogie der frühen Habsburger. Basel 2012.
• Anne-Marie Dubler: Acta Murensia In: Historisches Lexikon vo dr Schwiiz.