D Adolph Saurer AG isch de gröscht Härsteller vo Laschtwäge i de Schwiiz gsi. Di hütig Nochfolggsellschaft Saurer AG isch e groosse Produzänt vo Tegschtiilmaschine; si ghört sid 2013 em chineesische Undernääme Jinsheng.

Ane 1853 hät de Franz Saurer z Sanggale en Ysegiesserei ggründet. Die isch gly drufabe uf Arbon im Kanton Thurgau verleit worde und hät vo ane 1869 aa Stickereimaschine afo poue. De Adolph Saurer hät us de Firma e grossi Maschinefabrigg gmacht. 1897 hät die aagfange, Autoo mit Verbrännigsmotoore z poue. Vil vo de Saurer-Chassis sind uf Züri id Garrosserii Geissbärger broocht und do als Personewäge fertig gmacht worde.

Ane 1903 hät d Fabrigg vom Adolph Saurer agfange Laschtwäge z konschtruiere. Vo 1914 a hät si sech ganz uf die Fahrzüg und uf e Bou vo Autobüs konzäntriert. Die sind grad au als Poschtauto i de Schwiiz wyt verbreitet gsi. Und scho im Erschte Wältchrieg hät de Saurer de Schwiizer Armee Laschtwäge gliferet, und au spööter isch s Milidäär en groosse Chund vo de Arboner Laschtwagefabrigg plibe.

1982 hät sech d Adolph Saurer AG mit de FBW z Wetzike zsämetoo, und do druus isch die nöi Firma Nutzfahrzeuggesellschaft Arbon & Wetzikon (NAW) entstande. Daimler-Benz hät 40 Prozänt vo däm Undernääme gha. Ane 1983 hät de Saurer de letscht Laschtwage für en Privaate usgliferet, und 1987 au de letscht für d Schwiizer Armee. Und ane 2002 isch au d NAW verschwunde. D Motoore-Abtäilig vo de Adolph Saurer isch vo de iteliänische Firma IVECO übernaa worde.

Literatur ändere

  • Kurt Sahli: Saurer. Geschichte einer Nutzfahrzeugfabrik. Stämpfli-Verlag, Bern 1987, ISBN 3-7272-9625-9.
  • Hans Ulrich Wipf, Mario König, Adrian Knoepfli: Saurer. Vom Ostschweizer Kleinbetrieb zum internationalen Technologiekonzern. hier+jetzt, Verlag für Kultur und Geschichte, Baden 2003, ISBN 3-906419-55-X.
  • Markus Mäder: Drei Generationen Saurer. Franz Saurer (1806–1882), Adolph Saurer (1841–1920), Hippolyt Saurer (1878–1936). (Schweizer Pioniere der Wirtschaft und Technik, Band 48). Verein für wirtschaftshistorische Studien, Meilen 1988.

Weblink ändere

  Commons: Adolph Saurer – Sammlig vo Multimediadateie