Agatebrot

S Agatebröötli isch es Gebäck, wo men am Maantag vo dr Häilige Agate, das isch dr 5. Februar, oder grad vorhäär i dr Chile tuet sägne und de Lüüt mitgää. Es git i de katolische Gägende bsunders i de Regioonen a den Alpe vill Brüüch mit däm Brot; es paar Sache derzue cha me bim schwiizerdüütsche Mundartwörterbuech Idiotikon nochelääse.

es Agatebröötli

S Agathebrot chunt s erschte Mol anne 1466 im ene Rächnigsbuech vom Chlooschter Klingetal z Basel vor.

A vilnen Oorte goot dr Pfaarer zum Beck und weiht s Määl für s Bache vo dene Bröötli, wo me je nach Regioon mit verschidene Forme macht. Es gitt au Agateringli.

Vo däm spezielle chlyne Broot seit me, es hälfi bi Fieber und andere Chranketen und öppen au no wemme Häiwee het. Bi de Puure het me früener a mängem Oort so Bröötli de Chüe z frässe ggää, wo me mit ne z Alp isch, und dr Senn het eis i dr Alphütte hiigleit; das heig em Vee ghulfe.

S Agatebrot sig au guet für d Hüüser und d Huushaltige: es hälfi gäges Füür, d Agate isch jo d Schutzpatronin vo dr Füürweer, und wäär so nes Bröötli het, dä heig deheime immer gnueg Broot.

S Agatebroot stoot uf dr Lischte vo de tradizionelle Sache zum Ässe vo dr Schwiiz.

Weblink

• Agathabrot i de Datebank vom Kulinarische Erb vo de Schwiz
• Heilbrote uf mittelalter-lexikon.de