Dr Alexander Krannhals (1908-1961) isch e Schwizer Dirigänt und Komponist gsi.

Lääbe und Wärk ändere

Dr Krannhals isch am 16. Februar 1908 z Frankfurt am Main, Dütschland uf d Wält choo. Er isch z Aarau uf d Kantonsschuel gange. Vo 1936 bis 1940 het er am Konservatorium z Baasel Muusig studiert, s Dirigiere bim Felix vo Weingartner und Klavier bim Emil Frey.

Er het 1942 d Muusig für e Schwizer Spiilfilm Steibruch komponiert. Er isch Kapällmäister am Stadttheater Luzärn worde und spööter Gastdirigänt an de Theater vo Gämf, Stroossburg, Mülhuuse und am Theater vo de Champs Elysées z Bariis. Im Joor 1949 isch er Läiter vo dr Konzärtveräinigung Sanggalle worde und het gliichzitig am Konservatorium z Baasel as Läiter von ere Dirigänteklass Underricht gee. Äine vo sine Schüeler isch dr Rudolf Kelterborn gsi.

Vo 1953 aa isch dr Krannhals dr musikaalisch Läiter vo dr Niiderländische Opere z Amsterdam gsi, vo 1955 bis 1961 dr Generaalmuusigdiräkter und Noochfolger vom Otto Matzerath am Baadische Staatstheater und nääbebii het er d Sümfoniikonzärt vo dr Baadische Staatskapälle gläitet.

Dr Krannhals isch no Eeredirigänt vom Sümfoniiorchester z Madrid gsi und Vizebresidänt vom Schwizer Dirigänteverband.

Dr Alexander Krannhals isch am 15. Merz 1961 z Karlsrue gstorbe.

Kwelle ändere