Amerikanischi Bsatzigszone

Di amerikanisch Bsatzigszone (oder urspringli au Sidweschtzone) isch ain vu dr vier Bsatzigszone gsii, wu Dytschland weschtli vu dr Oder-Neiße-Linie vu dr alliierte Sigermächt im Juli 1945, rund zwee Monet no dr dytsche Kapitulation un em Änd vum Zweete Wältchrieg z Europa, dryy ufdailt woren isch. Si isch dr US-Militerregierig (OMGUS) unterstande un het ufghert no dr Grindig vu dr Bundesrepublik Dytschland, wu s Bsatzigsstatut am 21. Septämber 1949 in Chraft drätten isch. Di mit em Bsatzigsstatut verbundene alliierte Vorbehaltsrächt hän erscht anne 1990 mit dr dytsche Widerverainigung un em Inchraftdrätte vum Zwai-plus-Vier-Verdrag am 15. Merz 1991 au velkerrächtli iri Wirkig verlore, wu Dytschland di voll Suveränitet widerkriegt het.

Amerikanischi Bsatzigszone un Amerikanische Sektor vu Berlin ab 8. Juni 1947

Biet

US-Zonegränze im Gränzort Mödlareuth zwische Diringe un Bayern (1949)

Di amerikanisch Zone het zum aine Bayern umfasst mitsamt dr diringische Exklave Ostheim un ohni dr Krais Lindau un d Pfalz, derzue di preußische Provinze Kurhesse un Nassau (ohni di zuegherige Exklave un Krais Oberwesterwald, Unterwesterwald, Unterlahn un Sankt Goarshausen) un au Starkenburg, Oberhessen un dr dail vu Rhyhesse, wu uf dr eschtlige Syte vum Rhy glägen isch (Gränze isch d Mitti vu dr Schifffahrtsrinne vum Rhy gsii).

Schließli hän au no die Krais vu Wirttbärg un Bade zur amerikanische Bsatzigszone ghert, wu nerdli vu dr Rychsautobahn Kallsruh–Ulm, dr hitige A 8, gläge sin. Doderby handlet s si um d Stadtkrais Stuegert, Haalbrunn un Ulm un d Landkrais Backgena, Beblenga, Craalse, Ehringe, Esslenga, Geppenga, Gmend, Haalbrunn, Hall, Hoedna, Kinzelsau, Leaberg, Ludwigsburg, Märchedol, Nirtenga, Oola, Ulm, Vaihenga, Woeblenga z Wirttebärg un d Stadtkrais Kallsruh, Haidelberch, Mannem un Pforze un d Landkrais Bischem, Brusel, Buche, Haidelberch, Kallsruh, Mannem, Mosbach, Pforze un Sinse z Bade.

Zuesätzli sin Bremen un Bremerhaven (bis Dezämber 1945, mit dr Landkrais Wesermünde, Osterholz un Wesermarsch) Dail vu dr Zone gsii, wel si as Versorgigshafe fir di amerikanische Bsatzigsdruppe dient ghaa hän.

Dr sidweschtli Dail vu Groß-Berlin (Bezirk Zehlendorf, Steglitz, Schöneberg, Kreuzberg, Tempelhof, Neukölln) isch as amerikanische Sektor au dr US-Militerverwaltig unterstande.

S Bsatzigsstatut fir d Bundesrepublik het bis zum Inchraftdrätte vu dr Pariser Verdreg am 5. Mai 1955 gulte. S het aber au noocher no „alliierti Vorbhalt“ gee, zum Notstandsrächt (dodruf hän di Alliierte no dr Grundgsetz-Änderig am 28. Juni 1968 verzichtet) un fir „Dytschland as Ganzes“ het dr Bsatzigsstatus erscht ufghert mit dr Widerverainigung 1990.

Im Wanfrieder Abchuu sin Ortschafte an dr Werra mit Ortschafte in dr Sowjetische Bsatzigszone duscht wore fir e freie Zuegang zum ganze Verlau vu dr Bahnstrecki Bebra–Göttingen. Dodermit isch e Dail vum Eichsfeld in die Zone un speter zue Hesse chuu.

Bolitischi Organisation

Dur d „Proklamation Nr. 2“ sin am 19. Septämber 1945 im Rame vun eme federalistische Kunzäpt di erschte Länder in dr amerikanische Bsatingszone entstande.

Am 5. Merz 1946 isch s Gesetz zur Befreiung von Nationalsozialismus und Militarismus in Chraft drätte un isch zum Vorbild fir d Entnazifizierig in dr ibrige weschtlige Zone wore: Alli Dytsche iber 18 Johr hän in Frogebege mieße iber iri Funktion im nationalsozialistische Dytschland Uuschumft gee.

Us däre Zone het d Militerregierig vu dr Verainigte Staate 1945 bzw. 1946 d Länder Bayern, Wirttebärg-Bade, Groß-Hesse un Bremen bildet, wu im Länderrot vum amerikanische Bsatzungsbiet zämegschafft hän un am 23. Mai 1949 Dail vu dr Bundesrepublik Dytschland wore sin. Am 1. Jänner 1947 isch di amerikanisch mit dr Britische Bsatzigszone zur Bizone zämegschlosse wore.

Anne 1952 het s Land Wirttebärg-Bade mit dr Länder Bade un Wirttebärg-Hauezollre, wu in dr franzesische Bsatzigszone bildet wore sin, zum Land Bade-Wirttebärg fusioniert.

Militergouverneur

dr Eisenhower un dr Clay z Berlin 1945

Noch em Änd vum Zweete Wältchrieg isch zerscht dr speter Bresidänt Dwight D. Eisenhower Oberbefählshaber iber di amerikanische Druppe z Europa wore un het au s Amt vum Militergouverneur in dr amerikanische Zone ibernuu.

Syni Noofolger sin gsii:

• George S. Patton (Novämber 1945, kummissarisch)
• Joseph T. McNarney (Novämber 1945–Jänner 1947)
• Lucius D. Clay (änner 1947–Mai 1949)
• Clarence R. Huebner (Mai–Septämber 1949, kummissarisch)

No dr Militerregierig isch anne 1949 s Amt vu dr Hoche Kummissar chuu.

Literatur

• John Gimbel: Amerikanische Besatzungspolitik in Deutschland 1945–1949. S. Fischer Verlag, Frankfurt am Main 1971, ISBN 3-10-026101-1.
• Klaus-Dietmar Henke: Die amerikanische Besetzung Deutschlands. 3. Auflage. Oldenbourg, München 2009, ISBN 978-3-486-59079-1.
• Ralph Willett: The Americanization of Germany, 1945–1949. (Neuauflage). Routledge, London 1992, ISBN 0-415-07710-0 (formal falschi ISBN).
• Earl F. Ziemke: The U.S. Army in the Occupation of Germany, 1944–1946. Center of Military History, United States Army, Washington D.C. 1990 (history.army.mil).

Weblink

 Commons: Amerikanischi Bsatzigszone – Sammlig vo Multimediadateie

Fueßnote

Dä Artikel basiert uff ere fräie Übersetzig vu dere Version vum Artikel „Amerikanische_Besatzungszone“ vu de dütsche Wikipedia. E Liste vu de Autore un Versione isch do z finde.